Сибирийн ойн түймэр хяналтаас гарсан, энэ жил түймрийн хамрах талбай хоёр дахин нэмэгдсэн ч түймэр унтраахад дайчлагддаг Оросын цэргийн ангиуд Украинд байлдаж яваа тул галыг унтраах хэн ч алга гэж The Independent мэдээлжээ.

Сибирьт түймэр гарах нь энэ бүс нутгийн хувьд хэвийн үзэгдэл, хавраас намар хүртэл Сибирьт түймэр дэгддэг гэж эх сурвалж бичсэн байна. Харин түймэр унтраахад дайчлагддаг цэргийн анги нэгтгэлүүд энэ жил Украинд байлдаж яваа тул түймрийн цар хүрээ өдрөөс өдөрт нэмэгдэж, нөхцөл байдал хүндэрч байгаа гэнэ. 

"Томоохон түймрийн голомтыг илрүүлж, хиймэл дагуулаас шалгахын тулд цэргийн онгоцууд шаардлагатай байдаг. Гэтэл одоо цэргүүд Украинд байгаа тул дайн үргэлжилсээр байвал ирэх зун ч ийм техникийг түймэр унтраахад ашиглах боломжгүй болно. Эсвэл түймэр улам газар авна, эсвэл баруун фронтоос түймэр унтраах бие бүрэлдэхүүнийг татахаас аргагүй болно" хэмээн АНУ-ын Майамигийн их сургуулийн цаг уур судлаач Жессика Маккарти өгүүлсэн байна.

Энд дуулгахад, 2019 онд Сибирийн ойд асар их талбайг хамарсан түймэр гарч, утаа нь Монголд ч хүрч байв. Greenpeace-ийн мэдээлснээр мөн онд Оросын Холбооны  Улсад 12 сая га талбай бүхий ой шатжээ. 

Г.Бямбасүрэн