Боловсрол, сэтгэл судлалын академийн нийгмийн сэтгэл зүйн судалгааны хүрээлэнгийн нэгдсэн эрдэмтдийн зөвлөлөөс “Улс төр, нийгмийн сэтгэл зүйн доройтол шийдвэрлэх арга зам” сэдвээр мэдээлэл хийлээ. 

Нэгдсэн эрдэмтдийн зөвлөлийн төлөөлөл “Нийгмийн сэтгэлзүй олонх нь амьдрах арга нь мухардаж, тэсвэр тэвчээр нь барагдсан, сэтгэлзүйн хувьд гундаж, доройтсон байдалд хүрээд байна. Үүнийг болж буй удаа дараагийн үйл явдлууд, залуусын шаардлагаас харж, сонссон байх. Залуусын жагсаал цуглаанд “Бид Монголдоо амьдармаар байна” гэсэн зүйлийг хэлж байсан. Энэ бүхнээс буруутан нь хэн бэ гэдэг асуулт гарна.

...Энэ бүхний эцсийн буруутан нь 1992 онд баталсан Үндсэн хууль. Үндсэн хууль бүх буруу, хазгай үйл явдлын уг суурь нь юм. Үндсэн хууль гэдэг нь улсын удаан хугацаанд оршин тогтнол, ард түмнийхээ аз жаргалтай байдлыг хангахын төлөөх нийгмийн харилцааг хуульчлан тогтоосон баримт бичиг байх ёстой юм. Төр гэдэг нь улс үндэстнийхээ эрх ашиг, ард түмнийхээ аз жаргал сайн сайхан байдал, бүтээлч оюун сэтгэлийг хөгжүүлэх бодлогыг хэрэгжүүлдэг механизм байх ёстой. Уг бодлого, зорилтоос өчүүхэн гажсан тохиолдолд засаж, өөрчилж, арга хэмжээ авч чаддаг өөрийн гэсэн дотоод хяналтын механизмтай бүтэц тогтолцоо байх ёстой.

Гэтэл өнөөдрийн үндсэн хуулиар төр нь улс үндэстнийхээ эрх ашгийг хамгаалах, ард түмнийхээ аз жаргалтай сайн сайхан амьдралыг хангах ямар ч үүргийг хүлээгээгүй. Тиймээс хяналтын механизм байхгүй.

...Мөнгөтэй хүн мөнхөрнө гэсэн бодолтой улс төрч гэгдэх улс төрийн бүлэглэлүүдийг бий болгоход Монгол Улсын Үндсэн хууль зориулагдсан. Тодруулж хэлбэл, эрх мэдэлтэй тонуулчид бол төр юм гэсэн ойлголтыг Монгол Улсын Үндсэн хуулинд суулгаж өгсөн.

... Тиймээс өнөөгийн нийгмийг өөрчилж, эх орондоо сайхан амьдрахын тулд юуны түрүүнд үндсэн хуулиа өөрчилж, төрийн тогтолцоог бий болгох ёстой." гэж мэдээллээ .

М.Насан