2022 оны тавдугаар сарын есний өдөр Улаан талбай дээр болох парадад энэ онд өмнөх онтой харьцуулахад цөөн хүн, техник оролцохоор болжээ. 

Оросын Батлан хамгаалах яамны гаргасан мэдээлэлд өгүүлснээр, 2022 оны парадад 129 цэргийн техник оролцох юм байна. Харин өнгөрсөн жил 191 техник оролцож байлаа. 

Талбай дээгүүр алхан өнгөрөх жагсаалд 10 мянган хүн оролцох бөгөөд тэдний тоонд казакууд, "Юнармия" цэрэгжсэн хөдөлгөөний хүүхдүүд багтах юм байна. 2021 онд парадад 12 мянган хүн оролцож байв. Харин агаарын үзүүлбэр нь өмнөх жилтэй харьцуулахад нэг онгоцоор илүү буюу 77 онгоц, нисдэг тэрэг оролцох юм байна.

Батлан хамгаалах яамны гаргасан мэдээллээс харахад, 2021 онд парадад оролцож байсан зарим төрлийн цэргийн техник энэ удаад Улаан талбай дээр гарахгүй аж.

Өнгөрсөн жил парадад оролцож байсан ч энэ онд парадын бүрэлдэхүүнд багтаагүй техникийн дунд Т-80БВМ танк, "Коадиция-СВ" 2С35 өөрөө явагч артиллерийн төхөөрөмж, ТОС-1А хүнд галын систем, "Замедление" алсаас минижүүлэх инженерийн системийн машин, "Панцирь-С" зенитийн комплекс болон Росгвардын бүх машинууд багтаж байна. 

ВВС агентлагийн мэдээлснээр, Т-80БВМ танк, "Панцирь" зэрэг төхөөрөмжүүд Украинд ажиглагдсан гэнэ. 

Г.Бямбасүрэн