Хоёрдугаар сарын 24-ний өдөр Оросын Ерөнхийлөгч Владимир Путиний тушаалаар тус улсын арми хөрш оронруугаа довтолсноос хойш хэдийнэ гурван сарын хугацаа өнгөрөөд байна. Байлдааны ажиллагааны улмаас Украины экспортын гол боомтуудаас үр тариа нийлүүлэх боломжгүй болж, 22 сая тонн үр тариа боомтууд дээр хуримтлагджээ.

Нөхцөл байдал цааш энэ хэвээр үргэлжилвэл дэлхийн олон орон өлсгөлөнд нэрвэгдэнэ гэж НҮБ анхааруулж байсан ч Оросын талаас ямар нэг арга хэмжээ аваагүй байгаа юм. Энэ нь ОХУ зориуд ийм үйлдэл хийж байгаатай холбоотой гэж Украины Ерөнхийлөгч мэдэгджээ. 

"Орос улс  Хар тэнгис дэх манай боомтуудыг хааж, Азовын тэнгисийн эргийн манай талын нутгийг эзлэсний улмаас бид 22 сая тонн үр тариаг экспортлож чадахгүй байна. Энэ бол гадаад зах зээл дээр гаргах ёстой үр тариа. Орос улс манай экспортыг хааж байгаа нь дэлхий дахины нөхцөл байдлыг тогтворгүйжүүлж байна. Үүний улмаас олон оронд хүнсний үнэ өснө. Энэ нь өлсгөлөнгийн аюул нүүрлэнэ гэсэн үг. Африк, Ази, Европын зарим оронд өлсгөлөн нүүрлэх аюултай"  гэж Зеленский онцолсон байна.

Чухамхүү ийм нөхцөл байдал үүсгэхээр ОХУ зориуд боомтуудыг хааж байгаа хэмээн Зеленский үзэж байгаа аж.

"Тэд зориудаар ийм асуудлыг үүсгэж байгаа. Европ даяар хүнд байдалд орж, Украин экспортоосоо олон тэрбум доллар олж чадахгүй байх нөхцөлийг үүсгэхийн тулд зориуд үүнийг хийж байна. Экспортоосоо олон тэрбумыг олвол энэ нь одоо манай эдийн засагт нэн хэрэгтэй байх байлаа. Харин Африк болон Азийн орнуудын оршин суугчдыг Оросын эрх баригчид золионд гаргачихлаа" хэмээн Украины Ерөнхийлөгч Владимир Зеленский мэдэгджээ.

Энд дуулгахад, Украины хямрал дэлхийн 1,7 тэрбум хүнийг ядуурал, өлсгөлөнд нэрвэгдүүлж болзошгүй гэж НҮБ-ын Ерөнхий нарийн бичгийн дарга Антониу Гутерриш мэдэгдэж байлаа. Тэрбээр Украин руу халдсан Оросын үйлдлийг хөгжиж буй орнууд руу чиглэсэн "чимээгүй халдлага" хэмээн нэрлэж байв. Түүнчлэн Украины хямралаас болж хүн амын хамгийн ядуу буурай хэсэг хохирно, үүнийг шийдэх ганц л арга нь энх тайван тогтоох явдал гэж онцолж байсан юм.  Украин улс дэлхийн нийт үр тариа нийлүүлэлтийн 10 гаруй хувийг дангаар хангадаг бөгөөд энэ улсад дайн дэгдэж, боомтууд хаагдаж, олон сая тонн үр тариаг экспортлох боломжгүй болсноор буурай орнуудад хүнсний үнэ өсөж, цаашлаад өлсгөлөнд нэрвэгдэж болзошгүй гэж олон улсын байгууллагууд анхааруулсаар байна. 

Г.Бямбасүрэн