ОХУ-ын Ерөнхийлөгч Владимир Путиний эрүүл мэндтэй холбоотой мэдээлэл өмнө нь үе үе гардаг байсан ч дайн эхэлсний дараагаар түүнийг хавдартай залгамжлагчаа тодруулна гэх мэдээлэл улам ихээр гарах болсон юм. Путин Оросын Аюулгүй байдлын зөвлөлийн нарийн бичгийн дарга Николай Патрушевийг залгамжлагчаараа үлдээж болзошгүй гэх мэдээлэл барууны хэвлэлүүдээр гарч байсан бол энэ удаад Generall SVR гэх Телеграм суваг Путинийг охидынхоо нэгд албан тушаал бэлэглэнэ хэмээн бичжээ. Энэ суваг Путинтэй "ярилцсан хүмүүсээс авсан" эх сурвалжтайгаар ийнхүү мэдээлсэн байна. 

"Өнгөрсөн амралтын өдрүүдэд Оросын Ерөнхийлөгч Владимир Путин ойрын хүрээллийнхээ хүмүүстэй эрх мэдлээс аажмаар холдох, дэглэмийн удирдлага солигдсон үед залгамж халааг хангах аргуудын талаар хэлэлцсэн. Энэ яриа зүгээр ч нэг хоосон яриа байгаагүй" хэмээн Generall SVR телеграм сувагт бичжээ.

Эх сурвалжуудын мэдээлснээр, Путин нэгэнтээ ерөнхийлөгчийн албыг улиран хаших боломжгүй болсон үедээ өөрийнхөө оронд тавьж байсан Медведевийг "хойд захын хар овоохой" болгохоор зэхэж байгаа гэнэ.

Путин түүнд Зүүн Өмнөд Азийн аль нэг оронд элчин сайдын суудал санал болгох бөгөөд гэхдээ үүнээс өмнө "Единая Россия" намын рейтинг унасны бүх бурууг Медведев өөр дээрээ авахаас өөр аргагүй болно гэж эх сурвалжууд өгүүлсэн байна.

"Путиний төлөвлөгөөгөөр бол, энэ оны намрын сүүлээр "Единая Россия" намын рейтинг буурч, намыг шинэ хүн удирдах ёстой гэсэн хандлага гарч ирнэ. Үүний зэрэгцээ бүхий л олон нийтийн судлгаагаар Оросын ард түмэн эмэгтэй удирдагчтай болох хүсэлтэй гэдгийг харуулна" хэмээн  Generall SVR суваг бичжээ. 

Энэ сувгийн мэдээлснээр, Путин охидынхоо нэг болох Екатерина Тихоноваг намын дарга болгохоор бэлдэж байгаа гэнэ. Тихонова албан тушаалд очиж, харин Путин эрх мэдлээс холдсон мэт дүр эсгэх аж. Энэ зорилгодоо Патрушевийг ч ашиглана гэж эх сурвалж мэдээлжээ. Өмнө нь барууны хэвлэлүүдээр гарсан мэдээллээр, Оросын Аюулгүй байдлын зөвлөлийн нарийн бичгийн дарга Николай Патрушевийг Путиний залгамжлагч болно гэж мэдээлж байсан бол Generall SVR суваг энэ Патрушев биш харин Дмитрий Патрушев хэмээх хөдөө аж ахуйн сайдыг нэрлэсэн байна.

"Шинэ жил дөхөх үеэр Путин ээлжит бус ерөнхийлөгчийн сонгууль зарлах төлөвлөгөөтэй. Энэ сонгууль 2023 оны гуравдугаар сарын 26-ны өдөр болно. Сонгуульд Путин өөрөө оролцохгүй, харин Дмитрий Патрушевийг дэмжинэ. Өнөөгийн Засгийн газарт Хөдөө аж ахуйн сайдын алба хашиж байгаа Дмитрий Патрушевийг сонгуулиас өмнө засгийн газрын бүрэлдэхүүнээс гаргана. Ингэснээр түүний тэргүүлж буй салбарт үүссэн хямралыг Патрушевт тохохгүй гэсэн санаа. Путин бие нь дийлж л байвал Төрийн зөвлөлийн дарга, улс орны жинхэнэ удирдагч хэвээр л байна" хэмээн Generall SVR суваг бичжээ. 

Generall SVR телеграм сувгийн дамжуулсан энэ мэдээлэл өөр эх сурвалжуудаар батлагдаагүй бөгөөд Оросын эрх баригчид мэдээлэлтэй холбоотой ямар нэг тайлбар хийгээгүй байна.

Г.Бямбасүрэн