Өвөрхангай аймгийн Тарагт сумын ИТХ-ын төлөөлөгч Н.Галбадрах үнэнийг хайж, Сүхбаатарын талбайд мөлхөж байна.

Тэрбээр “Монголоос үнэнийг хайж есөн сар явж байна. Есөн сар яваад Монголоос үнэнийг олж чадсангүй.

Тарагт суманд олон улсын байгууллага, орон нутгийн хөгжлийн сангийн 93 сая төгрөгөөр барьсан барилга одоо дахин засвар оруулах хэмжээнд хүрээд байна. Энэ байшин 2021 оны 08 дугаар сард барьж эхлээд 10 дугаар сард ашиглалтад өгсөн. Анх худалдааны төвийн зориулалтаар барьсан ч одоо цайны газар ажиллаж байна.

Энэ байшин 30-40 сая төгрөгөөр л баригдсан. Үлдсэн хөрөнгийг хуваагаад идчихлээ. Энэ асуудлаар бүх шатаар нь яваад хамгийн сүүлд АТГ-т 05 дугаар сарын 02-нд энэ байшингийнхаа бүх материалыг авчирч өгсөн. Энэ ажилд сумын ИТХ-ын дарга холбоотой.

Төсвийн хөрөнгийг ингэж үргүй зардаг байдал Монгол даяар бий болсон. Багийн төвийн барилга, сумын спорт заалнаас эхлээд төсвийн хөрөнгө юу болж хувирч байна вэ. Төсөв эзэнгүй юм уу. Ард иргэд яагаад хяналт тавьж чадахгүй байна вэ гэсэн асуултыг бүх шатанд тавилаа. Үнэн алга. Хамгийн сүүлд үнэнийг мөлхөж байгаад Ерөнхийлөгчөөс үнэнийг олж өгөөч гэж хүсэж байна” гэсэн мэдээллийг өглөө.

Түүнийг жагсаж эсвэл сууж эсэргүүцэл илэрхийлэхээр хуулийн байгууллагаас таслан зогсоож, хүчээр болиулж болзошгүй учраас мөлхөж байгаагаа хэллээ.

Б.Хэрлэн