Ерөнхий сайд Засгийн газраа бүрдүүлэхээр нэр дэвшүүлсэн зургаан  сайдыг томилуулах асуудлаар Ерөнхийлөгчтэй зөвшилцөх бичгээ  дахин  хүргүүлсэн. Уг албан бичигт Таны тавьсан асуудлын дагуу өмнөх Засгийн газрын гишүүн, сайд нарыг үүрэгт ажлаас нь чөлөөлсөн гэдгээ мэдэгдсэн байна. Мөн шинээр ирүүлсэн зөвшилцөх хүсэлтдээ өмнө санал болгосон У.Хүрэлсүх, Д.Хаянхярваа, Д.Цогтбаатар, Ж.Энхбаяр, Ц.Дашдорж, Н.Хүрэлбаатар нарыг Засгийн газрын гишүүн, сайдаар томилуулах хүсэлтээ дахин илэрхийлсэн байна. Өмнөговь аймагт ажиллахаасаа өмнө сайдад нэр дэвшигчдийг хүлээн авч цээжиндээ бугшсан үгээ хэлж санаа амарсан. Дараа нь  хамтарсан Засгийн газраас  гарч буй сайд нараа хуулийн хүрээнд ажлаас нь чөлөөлчихөөд дараагийн сайд нарын асуудлыг ярихыг сануулж одсон. Тэгвэл өнөөдөр Ерөнхийлөгч зөвшилцөлд ямар хариулт өгөхийг хүлээх өдөр. Харин Ерөнхийлөгч  хариугаа хэдийд, хэрхэн өгөхийг таашгүй.