2008 оны сонгуулийн дараахи үймээний үеэр дөрвөн хүн галт зэвсэгт өртөж амь үрэгдсэн хэргийг прокурорын дэргэдэх Мөрдөн байцаах албанд шалгаж зарим хавтаст хэргийг хяналтын шатнаас шүүх рүү шилжүүлсэн юм. Уг хэргийг шалгахад чиглэл өгч ажиллаж буй тус албаны дарга Б.Галдаа өчигдөр сэтгүүлчдэд мэдээлэл хийлээ.
-Цагдаагийн ажилтнууд галт зэвсэг хэрэглэсэн нь яг нотлох баримтаар тогтоогдсон уу, хөндлөнгийн хүмүүс буудсан ч гэж ярьдаг?
- Хөндлөнгийн хүн буудсан гэх ямар ч баримт мэдээлэл байхгүй. Галт зэвсэг хэрэглэсний улмаас дөрвөн хүний амь эрсдэж, зургаан хүний эрүүл мэндэд хүнд хохирол учирсан гэдэг нь тов тодорхой хэрэг юм. Үүнийг 100 гаруй хүний гэрчийн мэдүүлгээс харж болно. Энэ хэргийг шүүх рүү шилжүүлсэн учрээс эцсийн шийдвэрийг шүүх гаргана. Хавтаст хэргийг шүүх рүү шилжүүлсэн өдрөөс эхэлж цагдаагийн ар гэрийн холбоонынхон удаа дараа мэдэгдэл хийж байгаа нь шүүх ажиллагаанд хөндлөнгөөс нөлөөлөх гэсэн оролдлого гэж ойлгогдож байна. Цагдаагийн албан хаагчид галт зэвсэг тарааж өгч хэрэглэсэн нь баримт, 100 гаруй хүний гэрчийн мэдүүлгээр нотлогдсон.
-Х.Тэмүүжин гишүүний олон нийтэд дэлгэсэн баримт хавтаст хэрэгт бий юу?
- Хавтас хэрэг доторх баримтыг олон нийтэд задалсан зүйлгүй. Тэгвэл мөрдөн байцаалтын нууц задруулсанд тооцогдоно. УИХ-ын гишүүн Х.Тэмүүжиний олон нийтэд үзүүлсэн тэмдэглэлийн дэвтрийг шалгасан. Тэмдэглэл бичсэн цагдаагийн албан хаагчаас мэдүүлэг авсан.
Дашрамд дурдахад Цагдаагийн ерөнхий газрын даргын үүрэг гүйцэтгэгч асан, хошууч генерал Ч.Амарболд, нийслэлийн Цагдаагийн газрын дарга асан хурандаа Д.Зоригт, Эргүүл хамгаалалтын газрын дарга асан хурандаа Ш.Батсүх, Хэв журмын хэлтсийн даргаар ажиллаж байсан дэд хурандаа Г.Ганбаатар нар өөрсдөд нь холбогдох хавтаст хэрэгтэйгээ бүрэн танилцсан юм байна. Тэдэнд Эрүүгийн хуулийн 294 дүгээр зүйлийн 294.2-т зааснаар ял төлөвлөжээ. Эрүүгийн хуулийн дээрх зүйл, ангид “Захирагч эрх мэдэл албан тушаалынхаа байдлыг урвуулсан, хэтрүүлсэн, албаны бүрэн эрхээ хэрэгжүүлээгүйгээс их буюу онц их хэмжээний хохирол, хүнд хор уршиг учирсан бол 5-10 жил хүртэл хугацаагаар хорих ял шийтгэнэ” гэж заасан байдаг. Өөрөөр хэлбэл, хурандаа нарыг эрх мэдлээ урвуулан ашиглаж буудах тушаал өгсөн гэх үндэслэлээр буруутгах бололтой. Мөн Эрүүгийн хуулийн энэ зүйл анги Өршөөл үзүүлэх тухай хуульд хамрагдахгүй аж.
СЭТГЭГДЭЛ БИЧИХ