Европ даяар аагим халуун өдрүүд үргэлжилж, хэт халуун, хүчтэй салхины улмаас Герман, Грек, Испанид ихээхэн газар нутгийг хамарсан түймэр дэгдсэн талаар DW агентлаг мэдээлжээ. 

Эх сурвалжийн мэдээлснээр, Германд гарсан гал түймрийн улмаас оршин суугчдыг нүүлгэн шилжүүлэхээс аргагүй болсон гэнэ. Тухайлбал, Берлин хотоос холгүйхэн ихээхэн нутгийг хамарсан ойн түймэр гарсан тул хотын ойролцоох тосгоны оршин суугчдыг нүүлгэн шилжүүлжээ.

Германы Үндэсний цаг уурын агентлагийн мэдээлснээр, тус улсын дорнод хэсэгт агаарын хэм 38 градус хүрч халсан байна. Цаашид ч энэ байдал үргэлжилж, гал түймэр газар авч байгаа тул Германы нийслэлээс холгүй оршин 20 суурингийн оршин суугчдыг нэн даруй аюулгүй газар нүүлгэх шийдвэр гарчээ. 

Мөн Грект ч хэт халууны улмаас гал түймэр дэгдэж, Эвбея арал дээр ням гарагт гал оршин суугчдын байшингаас 800 метр зайд тулж ирсэн тул Кремастос сууринг бүхэлд нь нүүлгэн шилжүүлсэн байна.

Г.Бямбасүрэн