ОХУ-ын Ерөнхийлөгч Владимир Путин хоёрдугаар сарын 24-ний өдөр "тусгай цэргийн ажиллагаа" эхлүүлэх тушаал өгснөөр өнөөгийн дайн эхэлсэн. Хөрш оронруугаа халдаж, дайн дэгдээсэн Оросын эсрэг барууныхан төрөл бүрийн хориг арга хэмжээ тавьж, харин дэлхийн нэртэй компаниуд Оросын зах зээлийг орхин гарсаар байгаа юм. 

Мягмар гарагт Оросын зах зээлээс гарч байгаагаа хэд хэдэн компани зарлалаа. Тодруулбал машины дугуй үйлдвэрлэгч, Францын Michelin болон Финландын Nokian Tyres компаниуд Оросыг орхин гарахаар боллоо. Финляндын дугуй үйлдвэрлэгч компанид үйлдвэрлэсэн суудлын автомашины нийт дугуйны 80 хувь нь Оросын зах зээлд нийлүүлэгддэг байжээ.

Францын Michelin компани энэ онд багтаан Орос дахь үйл ажиллагаагаа Оросын талын удирдлагад шилжүүлэхээр болсон байна. ОХУ руу нийлүүлэлт хийхэд хүндрэлтэй болсон тул энэ компани үйлдвэрлэлээ сэргээх боломжгүй болж ийм шийдвэр гаргажээ. 

Оросыг орхих болсноо мягмар гарагт зарласан гадаадын өөр нэг компани нь Британийн Diageo юм. Smirnoff архи, Johnnie Walker виски, Guinness шар айраг, Baileys ликер, Captain Morgan ром үйлдвэрлэдэг энэ компани дайнаас өмнө Оросын 70 мянган дэлгүүр, 19 мянган зоогийн газарт бүтээгдэхүүнээ нийлүүлдэг байжээ.

Г.Бямбасүрэн