Их Британийн Гадаад хэргийн сайд, өдгөө Ерөнхий сайдад нэр дэвшиж байгаа Лиз Трасс сонгуульд ялсан тохиолдолд Оросын талаарх тагнуулын мэдээг задлана гэж мэдэгджээ. Тэрбээр Ерөнхий сайдын албан тушаалд очвол ОХУ-ын Ерөнхийлөгч Владимир Путиний тактикийг дэлхий нийтэд задлахын тулд бүхнийг хийхээ амалсан гэж ВВС мэдээлсэн байна. 

"Эрх чөлөөт ардчиллыг нураах, тогтворгүй болгох гэсэн Кремлийн оролдлогыг нийтэд дэлгэхийн тулд" Их Британи олж авсан тагнуулын мэдээллээ ашиглана хэмээн Трасс мэдэгджээ. Түүнчлэн дэлхий нийтийн аюулгүй байдалд заналхийлж буй бусад орнуудад ч ийм аргыг ашиглана хэмээн тэрбээр онцолсон байна.

Энд дуулгахад, Британийн Ерөнхий сайд Борис Жонсон өөртэй нь холбоотой олон дуулиан гарсны дараа долдугаар сарын долооны өдөр Ерөнхий сайдын албан тушаалаасаа огцрохоор болсноо зарласан юм. Түүнчлэн тэрбээр Консерватив намын даргын ажлаасаа ч гарсан. Ингэснээр Консерватив нам шинэ даргаа сонгох шаардлагатай болсон бөгөөд ийн сонгогдсон дарга нь Их Британийн Ерөнхий сайдын албыг хаших юм. Энэ суудлын төлөө өрсөлдсөн нэр дэвшигчдээс сүүлийн шатанд сангийн сайд асан Риши Сунака, Гадаад хэргийн сайд Лиз Трасс нар тунаж үлдээд байна. Санал асуулгаас харахад Лиз Трасс ялах магадлал өндөр гэж гарсан талаар Sky News суваг мэдээлжээ.