Орос Украин руу түрэмгийлж эхэлсэнээс хойш Орост 224 иргэн дайн эсэргүүцсэнийхээ төлөө эрүүгийн хэргийн сэжигтэн болсон бол 3807 иргэн "ОХУ-ын Зэвсэгт хүчний нэр хүндийг гутаасан" хэргээр захиргааны хэрэгт татагджээ. Энэ талаар хүний эрхийг хамгаалах төсөл болох "ОВД-Инфо" мэдээлсэн байна. 

Эдгээр эрүүгийн хэргийн ихэнхийг буюу 90 хэргийг Оросын армийн талаар "худал мэдээлэл тараасан" гэдэг үндэслэлээр үүсгэжээ. Энэ төрлийн хэрэг хамгийн их үүсгэсэн газар нь Москва (53 хэрэг), Санкт-Петербург (36) хот гэж хүний эрхийг хамгаалагчид мэдэгдсэн байна.

Харин "Оросын армийн нэр хүндийг гутаасан" гэсэн захиргааны зүйл ангиар гуравдугаар сараас наймдугаар сарын хооронд нийт 3807 хэрэг нээжээ. Мөн л Москва, Санкт-Петербург хотууд ийм хэрэг хамгийн олон бүртгэгдсэн газруудыг тэргүүлсэн байна.

Оросын "тусгай ажиллагаа" гэгдэх түрэмгийлэл эхэлсэн хоёрдугаар сарын 24-нөөс хойш Оросын хүчний байгууллагууд дайн эсэргүүцсэн 16 437 хүнийг саатуулжээ.

Г.Бямбасүрэн