ОХУ-ын Ерөнхийлөгч Владимир Путин “тусгай цэргийн ажиллагаа” эхлүүлэх тушаалыг хоёрдугаар сарын 24-ний өдөр өгснөөр Оросын арми хөрш оронруугаа халдан өнөөгийн дайн эхэлснээр ням гарагт 186 дахь өдрөө үргэлжиллээ. Энэ өдөр Оросын цэргүүд Украины суурин газруудыг эзлэх оролдлогоо үргэлжлүүлж, харин Украины Зэвсэгт хүчин болон нутаг дэвсгэрийн хамгаалалтын отрядууд эсэргүүцэл үзүүлсэн хэвээр байгаа талаар олон улсын хэвлэлүүд мэдээлж байна. Өнгөрсөн хоногт Оросын өдүүлсэн Украин дахь дайны эргэн тойронд болсон үйл явдлуудыг товчлон хүргэе. 

Украины Зэвсэгт хүчин таван чиглэлд Оросын довтолгоог сөрөв 

Өнгөрсөн ням гарагт Украины цэргүүд Авдеевск, Бахмутск, Новоплавовск, Славянс, Харьков гэсэн таван чиглэлд Оросын цэргүүдийн довтолгоог сөрөн зогссон гэж Украины Зэвсэгт хүчний Ерөнхий штаб мэдээлсэн байна. Бусад чиглэлд ОХУ-ын арми артиллер болон танкаар буудах, Донецк мужийн нутаг дэвсгэр дээр бүрэн хяналтаа тогтоох, Херсон, Харьков, Николаев мужуудын хэсгүүдийг тогтоон барихад чиглэгдсэн ажиллагаагаа үргэлжлүүлсэн гэж Украины Ерөнхий штаб мэдэгджээ. 

Түүнчлэн, ням гарагт Херсон, Дарьевка, Новая Каховкад байрлах ОХУ-ын зэвсэгт хүчний удирдлагын гурван хэсэгт Украины тал пуужингийн болон артиллерийн цохилт өгсөн байна. Түүнчлэн Любимовка болон Херсон дахь Оросын зэвсгийн агуулахад цохилт өгснөөр Оросын 11 цэргийн алба хаагч амиа алдсан гэж Украины тал мэдээлжээ.

Мөн наймдугаар сарын 28-нд шилжих шөнө Украины Зэвсэгт хүчин Украины өмнөд хэсэгт байх Мирный сууринд Оросд нэгтгэх санал асуулгад бэлдэж байсан нэгэн барилгад цохилт өгч устгасан байна. 

Атомын цахилгаан станцын ажилтнуудыг тамлажээ

Европт хамгийн томд тооцогддог Украины Запорожийн атомын цахилгаан станц дээр Оросын цэргүүд хяналтаа тогтоосон бөгөөд энэ сарын эхээр станцын орчимд буун дуу гарах болсон юм. Цөмийн станцын орчимд ийнхүү буудалцаан болж байгаад талууд нэгнээ буруутгаж, улмаар Оросын талын санаачилгаар НҮБ-ын Аюулгүйн зөвлөл хуралдан, энэ станц дээр Олон улсын цөмийн эрчим хүчний агентлагийн шинжээчид ажиллахаар болж байлаа. 

Энэ зуур, Запорожийн атомын цахилгаан станцын ажилтнууд хүчирхийлэлд өртөж байгаа талаар Украины тусгай холбоо, мэдээллийн хамгаалалтын улсын алба мэдэгдсэн байна. Энэ байгууллагын мэдэгдсэнээр, Оросын тусгай албаныхан станцын ажилтнуудыг тамлаж, тэднийг станц дахь аюулын эрсдэлийн талаар МАГАТЭ-ийн мэргэжилтнүүдэд ам нээхгүй байхыг тулгаж байгаа гэнэ. 

Сүүлийн өдрүүдэд энэ станцын хувь заяа болон энд ажиллаж байгаа станцын ажилтнуудын талаарх мэдээлэл дэлхий дахины анхаарлын төвд байгаа юм. The Telegraph сонины сурвалжлагчид Запорожийн атомын цахилгаан станцад ажиллаж байсан болон ажиллаж байгаа хүмүүстэй ярилцахад тэд Оросын цэргүүд хэрхэн баривчилж, тамлаж байгаа талаар болон цөмийн объектын нутаг дэвсгэр дээр Оросын цэргийн техникүүд байрлаж байгаа талаар ярьжээ. Оросын тал харин энд ямар ч техник байхгүй гэж мэдэгдсээр ирсэн юм. 

“Бид чанга дэглэмтэй шоронд байгаа юм шиг л санагддаг. Байнгын сэтгэлзүйн дарамттай, ар гэрийнхэнтэйгээ холбоо барьж болохгүй. Учир нь оросууд бүх холбоог таслаж, гар утас ашиглахыг хориглосон” хэмээн нэг ажилтан The Telegraph сонины сурвалжлагчид ярьжээ. 

Ажилтнуудын өгүүлснээр, Оросын цэргүүд станцын орон тоог аюултай төвшинд хүртэл бууруулж, ажилтнуудыг станцаар явахыг хориглосон нь тэдний ажлыг ихээхэн хүндрүүлж байгаа гэнэ. 

“Биднийг шөнийн цагаар станцын нутаг дэвсгэрээр явахыг хориглосон учраас станцын тоног төхөөрөмжийг хянах боломжгүй болсон. Үүний зэрэгцээ цөмийн объект дээрх энгийн иргэдийн тоог бууруулахын тулд станцын ажилтнуудад явагддаг тогтмол сургалтыг явуулахыг ч хориглосон. Мөн станцын орчмын газрыг минижүүлсэн” хэмээн өөр нэг ажилтан ярьжээ. 

The Telegraph сонины бичсэнээр, сурвалжлагчидтай уулзсан ажилтнууд бүгд л станцын нутаг дэвсгэр дээр “Тигр”, “Пион” зэрэг хуягт тээвэрлэгч, хуягт машин зэрэг Оросын цэргийн техник байгаа гэдгийг баталсан гэнэ. 

Түүнчлэн дээр өгүүлсэн, станцын ажилтнуудыг тамлаж байгаа гэх Украины албаны мэдэгдлийг батлахуйц мэдээллийг станцын ажилтан The Telegraph-д өгчээ. 

“МАГАТЭ-ийн төлөөлөгчид станц дээр ажиллахтай холбоотойгоор бид ихэд түгшиж байгаа. Оросууд Украиныг буруутгахын тулд ямар нэг өдөөн хатгалга хийх вэ гэдгээс бид айж байна” хэмээн станцын ажилтан ярьсны дээр оросууд станцын ажилтнуудыг дарамталж, станцын аюулгүй байдлын эрсдэлийн талаар МАГАТЭ-ийнхэнд ярихгүй байхыг шаардаж байгааг онцолжээ. 

Өөр нэг ажилтны ярьснаар, атомын цахилгаан станцын ажилтнууд гэртээ эсвэл ажилдаа явах замдаа саатуулагддаг гэнэ. Тэдний зарим нь  14 хүртэлх хоногоор ч алга болж байжээ. Оросуудын хэрэглэдэг аргуудын нэг нь хүмүүсийг хонгилд аваачих, ажилтнуудын дунд цочрол үүсгэхгүйн тулд удирдлага нь энэ талаар огт ам нээдэггүй, хонгилоос буцаж ирсэн хүмүүс ч огт ярьдаггүй, Олон улсын цөмийн эрчим хүчний агентлагийнхан ирэхэд тэд оросуудын тушаасны дагуу яривал гайхах зүйлгүй гэж станцын ажилтан сурвалжлагчид ярьсан байна. 

Г.Бямбасүрэн