Дэлхийн хоёрдугаар дайны үед учруулсан хохирлын төлбөрийг Польш улс Германаас шаардана гэж эрх баригч намын тэргүүн Ярослав Качиньский мэдэгдсэнийг Forbes дамжуулжээ. 

Эх сурвалжийн мэдээлснээр, Качиньский Польшид учирсан хохирлыг 1,3 их наяд доллараар үнэлсэн бөгөөд энэ хэмжээний мөнгөн дүн Германы эдийн засагт хүндрэл учруулахааргүй гэж үзэж байгаагаа илэрхийлсэн байна. Мөн энэ мөнгөн дүнг "хамгийн консерватив аргаар" тооцоолж гаргасан, үнийн дүн нэмэгдэж болзошгүй гэж Качиньский онцолжээ. 

"Герман улс Польшийн эсрэг үйлдсэн гэмт хэргийнхээ хариуцлагыг хэзээ ч үүрээгүй. Бид герман ард түмний ухамсрыг сэргээх ёстой. Германы төр улс, ард түмэн 1939-1945 оны хооронд Польшид учруулсан хохирлын төлөө нөхөн төлбөр авах хэрэгтэй, магадгүй урт удаан, хүндхэн шүүх ажиллагаа үргэлжлэх байх" хэмээн Качиньский мэдэгджээ.

Түүний мэдэгдсэнээр, 1,3 их наяд долларын ихэнх хэсэг нь дайны үед амиа алдсан "5,2 сая польш хүний төлөөх нөхөн төлбөр" гэнэ. Энэ тооцоололд "оросуудын үйлдсэн гэмт хэрэг ороогүй" хэмээн Качиньский онцолжээ.

Өмнө нь, 2020 онд Качиньский Германы Bild сонинд ярилцага өгөхдөө Орос улс ч нөхөн төлбөр өгөх ёстой хэмээн мэдэгдэж байв. "Гэхдээ Москва хариуцлагаа үүрэх тэр цаг үе хүртэл манай үеийнхэн амьдарч чадна гэдэгт итгэлгүй байна" хэмээн Качиьнский мэдэгдэж байлаа. 

Энд дуулгахад, 2017 онд Польш улсад Германаас нөхөн төлбөр авах асуудал хариуцсан парламентын тусгай комиссыг байгуулж байв. Харин Герман улс Польшид дахин төлбөр өгөх шаардлагатай гэдгийг хүлээн зөвшөөрдөггүй, Польш улс 1953 онд Германы талыг хохирол нөхөн төлөх бүхий л үүргээ биелүүлсэн гэж үзсэн гэдгийг сануулдаг юм.

Г.Бямбасүрэн