Наймдугаар сарын 30-наас есдүгээр сарын нэгний хооронд Нью-Йорк хотноо болсон НҮБ-ын гишүүн орнуудын Цагдаагийн албадын дарга нарын уулзалтад оролцохоор Оросын Дотоод хэргийн сайд Владимир Колокольцев виз мэдүүлсэн ч АНУ-ын эрх баригчид түүнд виз олгохоос татгалзжээ. Энэ талаар НҮБ-ын дэргэдэх ОХУ-ын байнгын төлөөлөгч Василий Небензя мэдэгдсэнийг Регнум агентлаг дамжуулсан байна. 

Оросын Дотоод хэргийн сайд Владимир Колокольцев  Украины эсрэг ОХУ дайн өдүүлсний дараа АНУ болон Европын холбооны хоригт багтсан юм. Үүнээс ч өмнө, 2018 оны дөрөвдүгээр сараас түүнийг АНУ-ын хар жагсаалтад багтаасан бөгөөд Колокольцевыг 2016 онд болсон Америкийн Ерөнхийлөгчийн сонгуульд хөндлөнгөөс оролцсон гэж сэжиглэсний улмаас ийнхүү хориг тавьжээ.

Гэхдээ 2018 оны зургадугаар сард тэрбээр АНУ-аас виз авч, НҮБ-ын гишүүн орнуудын Цагдаагийн албадын дарга нарын уулзалтад оролцож байсан гэнэ. 

Г.Бямбасүрэн