ОХУ-ын Владивосток хотноо Дорнын эдийн засгийн форум үргэлжилж байна. Энэ форумд манай улсын Ерөнхий сайд Л.Оюун-Эрдэнэ тэргүүтэй төлөөлөгчид оролцож байгаа юм. Есдүгээр сарын долооны өдөр форумд ОХУ-ын Ерөнхийлөгч Владимир Путин оролцож, арга хэмжээнд урилгаар ирсэн гадаадын төрийн тэргүүнүүдтэй уулзлаа. Энэ үеэр Орос, Монголын хоёр талт хэлэлцээ болсон юм.

Ерөнхий сайд Л.Оюун-Эрдэнэ Владимир Путинтэй уулзахдаа УЦС зэрэг томоохон төслүүдийг хөндөн ярилцана гэж манай талаас мэдээлж байв. Харин “Монголын УЦС-ын асуудал дээр ОХУ экологийг чухалчилна” гэх утга бүхий байр суурь илэрхийлж байсан Оросын тал Путин, Л.Оюун-Эрдэнэ нарын хэлэлцээрийн үеэр УЦС яригдсан талаар мэдээлсэнгүй, харин Монголын нутгаар дамжих хийн хоолой, эрчим хүчний нийлүүлэлтийг нэмэгдүүлэх талаар тохиролцсон гэсэн мэдээллийг дамжуулжээ. 

Тодруулбал, Дорнын эдийн засгийн форумын үеэр Оросын Ерөнхийлөгч Владимир Путин “томоохон мэдэгдэл хийлээ, Монголоор дамжуулан Хятад руу хий нийлүүлэх үндсэн үзүүлэлтүүдийг хэдийнэ зөвшилцсөн гэж Путин мэдэгдэв” хэмээн РИА Новости мэдээлжээ. 

“Оросын эрчим хүчний түүхий эдийг нийлүүлэх маршрутуудын нэг нь Монголын нутгаар дамжих байх. Монгол бол манай улстай нөхөрсөг харилцаатай орон, улс төрийн тал дээр тогтвортой, тиймээс бид энэ тал дээр ямар нэг хүндрэл олж харахгүй байна. Энэ хэлэлцээрийн үндсэн бүх үзүүлэлтийг зөвшилцсөн, тэр бүү хэл үргэлж л амаргүй байдаг үнийн талаар ч Хятад нөхөдтэй хэдийнэ тохиролцсон. Манай хятад нөхөд бол хүндхэн хэлэлцэгчид, мэдээж ямар ч хэлэлцээ хийсэн үндэсний ашиг сонирхлоо нэн тэргүүнд тавих нь зөв. Гэхдээ тэд тогтвортой, найдвартай түншүүд, мөн Хятадын зах зээл асар том” хэмээн Путин мэдэгджээ. 

Эрчим хүчний нийлүүлэлт нэмэгдэнэ 

Хоёр талын хэлэлцээрийн үеэр эрчим хүчний салбарын талаар ч ярилцсан байна. Өмнө нь, долдугаар сарын эхээр Оросын Гадаад хэргийн сайд Сергей Лавров манай улсад ажлын айлчлал хийх үеэрээ Гадаад хэргийн сайд Б.Батцэцэгтэй уулзаж, олон асуудал хөндсөний дотор эрчим хүчний салбарын хамтарсан төслүүдийг хэлэлцсэн юм. 

Энэ удаад Дорнын эдийн засгийн форумын үеэр болсон хоёр талт уулзалт хэлэлцээрийн дүнд Монгол Улсад нийлүүлэх эрчим хүчний хэмжээг нэмэгдүүлэхээр болсон байна. 

Интерфакс агентлагийн мэдээлснээр, 2022 онд ОХУ Монгол, Хятад руу нийлүүлэх эрчим хүчний хэмжээ 19-20 хувь нэмэгдэж, 5,2 тэрбум кВт/цаг болно гэж Оросын Эрчим хүчний сайд Николай Шульгинов мэдэгджээ. 

“Оны дүнгээр дорнод чиглэлд (Хятад, Монгол) эрчим хүчний нийлүүлэлт 19-20 хувиар өсөж, нийлүүлэлт нэмэгдэнэ. Энэ онд нийтдээ 5,2тэрбум кВт/цаг болно гэж тооцоолж байна” хэмээн Шульгинов мэдэгджээ. 

Путин, Л.Оюун-Эрдэнэ нарын уулзалтаар “урт настай” Эгийн голын усан цахилгаан станцын төсөл "гацаанаас гарахаар болсон" гэж манай талын албан мэдээлэлд дурдсан байна.

"Монгол Улс нэг хүнд ногдох газар нутгийн хэмжээгээр дэлхийд нэгт эрэмбэлэгддэг. Үүгээрээ “Эрчим хүчний” бүс нутгийн хэмжээний том төслүүдийг хэрэгжүүлэх боломж бүрэн байгааг Ерөнхий сайд Л.Оюун-Эрдэнэ онцолж Эгийн голын усан цахилгаан станц болон бусад эрчим хүчний цахилгаан станцуудын өргөтгөл шинэчлэлийн талаар яриа хэлэлцээ хийгдэж буйг танилцуулсан. Яриа хэлэлцээний үр дүнд олон жил гацсан Эгийн голын усан цахилгаан станц төслийн асуудлыг НҮБ-тай хамтран шийдвэрлэж, мэргэжлийн шинжээч, судлаачдын баг гарган ажиллуулж Сэлэнгэ мөрөн, Байгаль нуурын усны нөөцөд нөлөөлөх байдлын үнэлгээ хийлгэж, эцэслэхээр тогтлоо. Оросын Холбооны Улсын зүгээс Эгийн голын усан цахилгаан станцын төсөл болон “ДЦС-З”-ын хүчин чадлыг нэмэгдүүлж өргөтгөхөд дэмжлэг үзүүлэхээ илэрхийллээ" хэмээн Засгийн газрын хэвлэл мэдээллийн албанаас гаргасан мэдээлэлд өгүүлжээ.

Энд дуулгахад, өмнө нь, Сергей Лавровын айлчлалын үеэр Ерөнхий сайд Эгийн голын УЦС төсөл дээр хамтран ажиллах саналыг Оросын талд тавьж байв. Түүнчлэн НҮБ-ын Ерөнхий нарийн бичгийн дарга Антониу Гутерриш айлчлалынхаа үеэр Монголын энэ төслийг дэмжинэ гэдгээ илэрхийлж байлаа. 

Г.Бямбасүрэн