Хонконгийн тэрбумтан Ричард Ли 27 настай Мо Ли бүжигчинд 1,27 сая доллар хандивлахаар болжээ. Бүжигчин залуу үзүүлбэрээ толилуулж байх үед тайзан дээр байрлуулсан дэлгэц түүн дээр унасны улмаас хоёр хөл мэдээгүй болсон хэмээн SCMP сонин мэдээлсэн байна. 

Эх сурвалжийн мэдээлснээр, энэ хэрэг долдугаар сарын сүүлээр болжээ. Тухайн үед Mirror хамтлагийн тоглолтын үеэр тайзан дээрх дэлгэц нурсан байна. Үүний улмаас гурван бүжигчин гэмтэж, тоглолтыг тэр дор нь зогсоожээ. 

Энэ тоглолтыг зохион байгуулж байсан компани нь MakerVille гэх төрөл бүрийн арга хэмжээ зохион байгуулдаг компани бөгөөд энэ компанийг багтаасан PCCW группийг тэрбумтан Ричард Ли эзэмшдэг аж. "Санхүүгийн тусламж тэдний өвчинг намдаахгүй гэдгийг ойлгож байна. Гэхдээ Мо болон түүний гэр бүлд туслахад хувь нэмрээ оруулна гэж найдаж байна" хэмээн Ричард Ли гэмтсэн бүжигчнийг эмнэлэгт эргэх үедээ өгүүлжээ. 

Түүнчлэн тэрбээр бүжигчний эмчилгээний бүхий л зардлыг төлнө хэмээн амалсан байна.