Орос улс 2014 оноос хойш дэлхий даяар улс төрийн намуудад 300 сая гаруй доллар шилжүүлсэн гэж АНУ-ын тагнуулын албанаас авсан эх сурвалжтайгаар Байдены захиргааны өндөр албан тушаалтан мэдэгджээ. 

"Орос улс 300 гаруй сая долларыг нууцаар шилжүүлсэний дээр дэлхийн 20 гаруй орны улс төрийн нам, албан тушаалтан, улс төрчдөд нууцаар мөнгө шилжүүлэхээр төлөвлөсөн гэдэг нь тогтоогдсон" хэмээн албан тушаалтан сэтгүүлчдэд өгүүлээд "зарим тохиолдолд ийм гүйлгээг маш нууцаар хийсэн байж болзошгүй" хэмээн онцолжээ. 

Түүний өгүүлснээр, аливаа улс төрийн намаас ашиг хонжоо давуу тал олж авах, тухайн орнуудын ардчиллыг үгүй хийх зорилгоор ОХУ санхүүжүүлж байсан гэнэ. Улмаар Төрийн департамент даваа гарагт хилийн чанад дахь АНУ-ын ЭСЯ, консулын газрууд руу дипломат цахилгаан утас илгээсэн гэх бөгөөд Европ, Африк, Өмнөд Азийн орнууд дахь дипломат төлөөлөгчийн газрууд руугаа анхааруулсан захидал илгээсэн гэж CNN мэдээлжээ.  Захидлын агуулгын талаар хэвлэлүүдэд мэдээлээгүй, гэхдээ АНУ-ын дипломат төлөөлөгчийн газрууд суугаа орныхоо засгийн газартай уулзаж, Оросын тал хөндлөнгөөс оролцож байгаа талаарх асуудлыг хэлэлцэх үүрэг хүлээсэн аж.

Оросын санхүүжилтийн талаарх мэдээллийг нийтэд дэлгэснээр дэлхий дахин Оросын улс төрийн нууц санхүүжилтийн талаар мэдээлэлтэй болж, бусад орнууд Оросын ажиллагааны талаарх өөрсдийн мэдээллийг хуваалцахаар АНУ-д хандах, Оросын далд улс төрийн нөлөөлөл нь "хамтдаа сөрөн зогсох ёстой олон улсын үзэгдэл" гэдгийг ойлгох зэрэг олон давуу талыг агуулж байгаа хэмээн Байдены захиргаа үзэж байгаа юм байна.

Г.Бямбасүрэн