ОХУ-ын Ерөнхийлөгч Владимир Путин есдүгээр сарын 21-ний өдөр хэсэгчилсэн дайчилгаа зарласны дараа Оросын иргэд, голчлон цэргийн насны эрчүүд олноороо гадаад орныг зорьж, тийзний эрэлт огцом нэмэгдсэний дээр хуурай замаар хиллэдэг улс орнуудыг зорьсон хүмүүсийн цуваа хэдэн км үргэлжилж байгаа гэх мэдээлэл гарсаар байна. 

Оросын иргэд тэр дундаа Сибирийн оршин суугчид хамгийн ойроор нь Монголыг зорих нь их байгаа юм. Буриад талаас Монгол руу орох хилийн боомт нь Хиагт, Монды бөгөөд Хиагтын боомт илүү ачаалалтай байгаа талаар Буриадын хэвлэлүүд мэдээлжээ. 

"Сибирь Реалии" сайтын мэдээлснээр, дайчилгаанаас зугтан Монголыг зорих нутаг нэгтнүүддээ туслах хөдөлгөөн ч Буриадад өрнөсөн байна. Оросын сөрөг хүчний удирдагч Навальный штабын зохицуулагч байсан, идэвхтэн Пётр Дондуков Улаан-Үд хотноо байрлаж, Монгол руу явах хүмүүст туслан Телеграм хуудсанд групп үүсгэн харилцаж байгаа аж. 

Тэрбээр "Оросын азиуд" хөдөлгөөн, "Эрх чөлөөт Буриад" сангийн гишүүдтэй хамтран Улаан-Үдээс Хиагт орох автобусуудыг зохион байгуулалтад оруулан явуулж байгаа гэнэ. Мөн Эрхүү, Якутаас ирсэн хүмүүс ч тэднээс тусламж хүсэж байгаа аж. 

"Нутаг нэгтнүүдийнхээ өмнөөс сэтгэл өвдөж байна, тиймээс л юугаар ч хамаагүй туслах хүсэлтэй" хэмээн Дондуков сэтгүүлчдэд ярьжээ.

Түүний өгүүлснээр, Хиагт руу орох хэсэг Холбооны аюулгүй байдлын албаны хилийн албаны пост байрладаг гэнэ. Эндэхийн ажилтнууд явах зорилгыг асуун, баримт бичиг үзээд "Монгол руу" гэсэн хариулт сонсмогцоо явуулж байгаа аж.

Хилээр гарахад ч асуудалгүй, гагцхүү шүүхээр хориг тавиулсан хүмүүс л хил нэвтэрч болохгүй байгаа, ийм хүмүүс тун цөөн гэж Дондуков өгүүлжээ.

Мөн Буриадын иргэд хоорондоо харилцаж байгаа чатуудаар Монголын хил удахгүй хаагдана, 30-аас доош насныхныг хилээр гаргахгүй, хил дээр байгаа дарааллыг цэргийн комиссарын газрынхан хянана гэх мэдээлэл гарсан байна. Гэхдээ энэ мэдээлэл одоогоор батлагдаагүй гэж Дондуков өгүүлжээ.

"Хил хаана гэх албан мэдээлэл гараагүй. Монгол руу явдаг автобусны жолооч "хилийг удахгүй хаана, цэргийн комиссарын газрын ажилтнууд ирнэ гэж боомтын даргаас сонссон" гэж надад хэлсэн. Гэхдээ энэ бол эрх баригчдаас зориуд тарааж байгаа худал мэдээ гэж би бодож байна" хэмээн Дондуков өгүүлжээ.

Гэхдээ, есдүгээр сарын 23-ны өдөр Хиагтын боомтын орчимд цагдаагийн ажилтнууд ирж ажилласан байна. Тэд зарим машин дээр очин, явах зорилго, цэргийн үүрэгтэн эсэхийг асууж байсан гэж Дондуков өгүүлжээ. Гэхдээ хэнд ч зарлан дуудах хуудас өгөөгүй, саатуулаагүй гэнэ.

Дондуковын өгүүлснээр, дайчилгаа зарласнаас хойш хоёр хоногийн дотор Буриадаас мянга орчим хүн явсан гэнэ. Хил дээр дүүрэн автобусууд байгаа бол автомашины дараалал 1,5 км үргэлжилж байгаа аж.

"Хилээр нэвтрэхийн тулд 6-12 цаг хүлээж байгаа, эрэлт их байгаа тул Алтанбулаг орох машинууд 5000 рубль нэхэх нь ч энүүхэнд"хэмээн Дондуков өгүүлжээ. 

Харин Монды боомт дээр байдал харьцангуй тайван, машин ч бага байгаа гэнэ.Энэ боомт 09.00-20.00 цагийн хооронд л ажилладаг юм. 

Г.Бямбасүрэн