ОХУ-д дайчилгаа зарлахаас өмнөх өдөр нь Эрүүгийн гэмт хэрэгт өөрчлөлт оруулан, цэргийн албанаас оргон зайлах, сайн дураар олзлогдох цэрэг фронт дээр гарч болзошгүй хэргүүдэд оноох ялыг чангатгасан юм. Үүний дараа Оросын хүний эрхийг хамгаалагч байгууллагууд төдийгүй Украины тал байлдаж байгаа оросуудыг олзонд бууж өгөхийг уриалж байлаа. Үүнээс өмнө ч Украины зэвсэгт хүчнийхэн орос цэргүүдийн байршил руу бууж өгөх зааварчилгаа бүхий сум илгээж байгаа гэх мэдээлэл гарч байсан юм. 

Улмаар хэсэгчилсэн дайчилгаа зарласантай холбоотойгоор олзонд бууж өгөх "Амьдармаар байна" төслийн утсанд хандах оросуудын тоо сүүлийн өдрүүдэд эрс нэмэгдсэн байна. Энэ талаар Украины Батлан хамгаалах яамны Тагнуулын ерөнхий газар мэдэгджээ. 

"Шинээр дайчлагдсан, тэр бүү хэл хараахан дайчилгаанд хамрагдаагүй хүмүүс ч шууд утсаар холбогдох нь эрс нэмэгдлээ. Өөрөөр хэлбэл, дайчлагдвал би юу хийх ёстой вэ, ямар алхам хийвэл буруудахгүй вэ гэх мэтээр асуух болсон" хэмээн Украины Батлан хамгаалах яамны төлөөлөгч Андрей Юсов Украины телевизэд ярилцлага өгөх үеэрээ мэдэгджээ.

Юсовын өгүүлснээр, Украины эзлэгдсэн нутаг дэвсгэрт амьдарч байгаа, Оросын арми хүчээр эгнээндээ нэгтгэж болзошгүй оршин суугчид ч энэ  шууд утсаар хандах боломжтой гэнэ.

"Зөвхөн оросууд төдийгүй Украины эзлэгдсэн нутаг дэвсгэрт амьдарч байгаа, хүчээр дайчлагдаж болзошгүй хүмүүс ч хандаж болно. Одоо Крымийн оршин суугчид болон өнөө хэр нь Украины паспорттай байгаа олон хүн байлдахыг хүсэхгүй байна, биднийг хүчээр авч явж болзошгүй гэж бидэнд хандаж байгаа" хэмээн Юсов мэдэгджээ.

Украинчууд оросуудыг хэрхэн олзонд бууж өгөхийг уриалж байв? 

Украины Зэвсэгт хүчин хэрхэн олзонд орж, бууж өгөх талаарх зааварчилгаа бүхий сумаар Оросын цэргүүд рүү буудаж байгаа гэсэн мэдээлэл энэ сарын дундуур гарч байлаа. Тодруулбал, давшилт хийхийн өмнө ийм арга хэрэглэж байгаа бөгөөд суртал ухуулгын хуудсуудыг шуурган галын тийрэлтэт систем ашиглан хүргэж байгаа аж. Сум тус бүр 1,5 мянган ухуулах хуудас багтаасан, энэ хуудсан дээр Украин удахгүй газар нутгаа эргүүлэн авна, Оросын цэргүүд зэвсгээ хураалган, амьд үлдэх боломжтой гэж бичсэн байна. 

Украины ухуулах хуудсанд дараах зааварчилгааг бичжээ.

"Хэрхэн олзлогдох вэ:

- Зэвсгээ хажуу тийш хаяна.

- Цэх босож зогсоно.

- Гараа дээш өргөнө.

- Түүнчлэн цагаан туг барьж болно (заавал туг барих шаардлагагүй)

- "Бууж өгье" гэж чангаар хашгирна"

Түүнчлэн Оросын армид татагдсан,  Донецк, Луганскийн зарим нутгуудын оршин суугчдад хандсан тусгай уриалга ч ухуулах хуудсанд багтжээ. Тэднийг бууж өгөхийг уриалж, ингэсэн нөхцөлд өршөөнө хэмээн амласан байна.

"Донбассын оршин суугч аа! Оросууд чамайг ашиглаж, золиос болгож байна. Чиний амь нас тэдэнд ямар ч үнэ цэнгүй. Чамайг нуувчинд байхад тэд гэртээ тав тухтай байгаа. Чамд энэ дайн хэрэггүй!  Украины Зэвсэгт хүчнийхэнд бууж өг. Украин чамайг өршөөж, аюулгүй байдлыг хангана. Чи гэр бүлийнхэндээ амьдаараа хэрэгтэй" хэмээн ухуулгын хуудсанд бичжээ.

Ийм сум хөөргөж, байндаа тусахын тулд урьдаас сум задрах цагийг тохируулж байгаа гэнэ. Ухуулах хуудсыг аль болох олон хүнд хүргэхийн тулд украинчууд өөр өөр чиглэлд буудаж байгаа аж.

Үүний дараа Орост есдүгээр сарын 21-ний өдөр хэсэгчилсэн дайчилгаа зарласны дараа Оросын хүний эрхийг хамгаалах байгууллагууд хууль хэрэгжиж эхлэхээс өмнө олзонд бууж өгөх, байлдахаас татгалзахыг уриалж байв.

Г.Бямбасүрэн