Сүхбаатар дүүргийн шүүхийн Эрүүгийн танхимд Налайх дүүргийн Татварын хэлтсийн дарга асан Н.Энхээд холбогдох хэргийг өнөөдөр 14.00 цагт хэлэлцэнэ. Түүнийг Эрүүгийн хуулийн 111.2-т зааснаар бусдын нэр төрд халдсан гутаан доромжилсон, гүтгэсэн хэмээн буруутгаж буй. Н.Энхээ нь 2010 онд  татварын албанд байгаа хууль бус үйлдлүүд, хүнд суртлыг ил гаргаж, олон нийтэд зарласан нь гүтгэлгийн шинжтэй мэдээлэл гэж хуулийн байгууллагаас үзсэн байна. Тодруулбал Н.Энхээ нь татварын албаны даргын үүрэг гүйцэтгэгч Ц.Оюунбаатарыг татварын байцаагчийн эрх олгох эрх зүйн чадамжгүй хэр нь  310 хүнийг хууль бусаар ажилд авсан. Түүнчлэн  100 орчим хүнийг үндэслэлгүйгээр ажлаас халсан. Татварын албанд ажилд ороход  2-10 сая төгрөгийн хахууль өгсөн хэмээн мэдэгдсэн нь түүнийг яллах үндэслэл болжээ. Хуралд шүүгчээр Ч.Хосбаяр, С.Оюунчимэг, Ш.Төгсгэрэл, улсын яллагчаар Б.Өнөрмаа, өмгөөлөгчөөр Г.Оюунцэцэг, А.Мөнхтөр, С.Хишигбат, шүүгч нар оролцоно. Н.Түвшин