Засгийн газрын өнөөдрийн хуралдаанаар хэлэлцсэн асуудал, гаргасан шийдвэрийн талаар мэдээлэл хийлээ. Сангийн сайд Б.Жавхлан өнөөдрийн хуралдаанд Хөгжлийн банкнаас төрийн өмчийн компаниудын авсан зээлийг төлж барагдуулах тухай Засгийн газраас өгсөн үүрэг чиглэлийн биелэлтийг танилцуулсан байна.

Өнгөрсөн нэг сарын хугацаанд нийтдээ 140 тэрбум төгрөгийн чанаргүй зээл бэлэн мөнгөөр төлөгдсөн байна. Үүний 117.3 тэрбум төгрөг нь Эрдэнэс Тавантолгой компаниас төлөгджээ. Тус компани нийтдээ 160 тэрбум төгрөгийн зээл төлөх ёстой аж. Үлдсэн 43 тэрбум төгрөгийг ирэх оны эхний улиралд төлөхөөр тохиролцсон байна. 

Мөн МИАТ компани зээлийн үлдэгдэл 10 тэрбум төгрөгөө төлөөд байна. Үүнээс гадна ТОСК, НОСК нийлээд нэг тэрбум төгрөгийг төлжээ. Ингэснээр нэгдүгээр сараас Хөгжлийн банкны 800 тэрбум төгрөгийн чанаргүй зээл төлөгджээ. Энэ жилийн эцэст Хөгжлийн банкны зээлийн төлөлтийг нэг их наяд төгрөгт хүргэх зорилготой байгаагаа Сангийн сайд хэлж байна. Ингэснээр тус банкны төлбөрийн тэнцэл сайжирч, ирэх жил төлөх хоёр бондны эрсдэл багасч байгаа аж.

Одоо Засгийн газраас Хөтөл цементийн үйлдвэр болон Эрэл компани, Шинэ Яармаг хорооллын чанаргүй зээлийг төлүүлэхэд төвлөрөн ажиллаж байна. Энэ ажилд АТГ дэмжлэг үзүүлж байгаа бөгөөд Эрэл ХХК-д албадлагын арга хэмжээ авч, өмчийг нь хураана гэдгийг Сангийн сайд хэллээ.

Б.Хэрлэн