Оросын довтолгоонд өмнө нь удаа дараа өртөж байсан, Украины нийслэл Киев хотод дахин агаарын түгшүүр зарлажээ. Энэ талаар Киев хотын захиргааны хэвлэлийн алба мэдээлсэн байна. 

"Анхаараарай! Киев хотод агаарын түгшүүр зарлалаа! Хүн бүр иргэний хамгаалалтын нуувчинд нэн даруй орохыг хүсэж байна!" хэмээн Киев хотын захиргааны Телеграм сувагт бичжээ. 

Өчигдөр буюу 10 дугаар сарын 17-ны даваа гарагийн өглөө Украины нийслэл камиказе дроны довтолгоонд өртсөн талаар Киев хотын дарга Виталий Кличко мэдэгдэж байлаа. Цохилтын улмаас хэд хэдэн барилга гэмтэж, нэг барилга хэсэгчилэн нурсны улмаас нуранганд даруулсан дөрвөн хүн амиа алдсаны дотор жирэмсэн эмэгтэй, нөхрийн хамт байжээ. Түүнчлэн олон хүн гэмтэж бэртсэн бөгөөд одоо эрэн хайх, аврах ажиллагаа үргэлжилж байгаа аж.

Кличко дроны цохилтын дараа нэг дроны хэлтэрхийний гэрэл зургуудыг олон нийтийн сүлжээн дэх хуудсандаа нийтлэж байлаа. Энэ хэлтэрхий дээр "Герань-2" хэмээх бичиг байх бөгөөд Оросын арми Ираны Шахед-136 камиказе дроныг ийнхүү тэмдэглэдэг аж. 

Даваа гарагийн өглөө цохилтод өртсөн өөр нэг хот нь Одесс байлаа. Нэг удаад л ашиглагддаг камиказе дроны цохилтын улмаас дэд бүтцэд хохирол учирсан талаар орон нутгийн эрх баригчид мэдээлжээ. Түүнчлэн мөн өдөр Сумск болон Днепропетровск мужуудад Оросын арми цохилт өгсөн байна.

Оросын арми өмнө нь Украины хотууд руу халдахдаа камиказе дроныг нэг бус удаа ашиглаж байлаа. Тухайлбал өнгөрсөн сард Одесс хот болон Одесс мужид ийм дроноор цохилт өгсөн гэсэн мэдээлэл гарч байсан юм. Мөн энэ сарын 15-ны өдөр Запорож мужид камиказе дроноор дөрвөн удаа цохилт өгсөн байна. Нэг удаад ашиглах зориулалттай камиказе дроныг ОХУ Иранаас авч байгаа гэж барууны орнууд баталж байгаа ч Иран, Орос үүнийг үгүйсгэсээр байгаа юм. 

Г.Бямбасүрэн