Германы Ерөнхийлөгч Франк-Вальтер Штайнмайер өнгөрсөн долоо хоногт Украинд айлчлахаар төлөвлөж байсан ч Германы холбогдох байгууллагууд түүний аюулгүй байдалд санаа зовнин, улмаар айлчлалыг цуцалж байсан. Тухайн үед айлчлалыг хэдэнд товлохоор зэхэж байгаа талаарх мэдээлэл гараагүй ч Штайнмайер "ойрын үед айлчилна гэдэгтээ найдаж байна" хэмээн мэдэгдэж байв. 

Штайнмайер ийн хэлсэн үгэндээ хүрч, 10 дугаар сарын 25-ны мягмар гарагт Киевт очжээ. Тэрбээр Киевт Украины Ерөнхийлөгч Владимир Зеленскийтэй уулзана гэж Германы DРА агентлаг мэдээлсэн байна. Эх сурвалжийн мэдээлснээр, Германы Ерөнхийлөгч мягмар гарагийн өглөө галт тэргээр Киевт ирсэн бөгөөд өнөөдөр үдэш Зеленскийтэй уулзах аж. 

Энд дуулгахад, Штайнмайер өнгөрсөн пүрэв гарагт Киевт айлчлах төлөвлөгөөтэй байсан ч айлчлалаа тодорхойгүй хугацаагаар хойшлуулсан юм. Германы Гадаад хэргийн яам, Дотоод хэргийн яам, Холбооны цагдаагийн газар болон төрийн бусад байгууллагууд Ерөнхийлөгчийнхөө аюулгүй байдалд санаа зовнисны улмаас ийнхүү айлчлалаа хойшлуулах шаардлагатай болсон гэж Германы хэвлэлүүд мэдээлж байв.

Г.Бямбасүрэн