1982 онд дэлгэцнээ гарсан Стивен Спилбергийн киноны гол баатар харь гарагийн хүний моделийг дуудлага худалдаагаар зарахаар болжээ. Энэ талаар The Guardian сонин мэдээлсэн байна. 

Эх сурвалжийн мэдээлснээр, харь гарагийн хүний загварыг дуудлага худалдаагаар зарах бөгөөд гурван сая доллараар үнэлэгдэнэ гэж таамаглаж байгаа аж. Харь гарагийн хүний загварыг  тусгай эффектийн дизайнер Карло Рамбальди бүтээсэн бөгөөд зураг авалтын үеэр хөдөлгөөнд зориулсан 85 дамжуулах утасны тусламжтайгаар 12 аниматор хүүхэлдэйг хөдөлгөдөг байжээ. Тухайн үед энэ загвар 1,5 сая доллараар үнэлэгддэг байсан гэнэ. 

Дуудлага худалдаа 12 дугаар сарын 17, 18-ны өдрүүдэд "Харь гарагийн хүн" кино дэлгэцнээ гарсны 40 жилийн ойд зориулсан арга хэмжээний үеэр Беверли Хиллздэд болох юм байна. Дуудлага худалдаанд Нимбус шүүр, Гриффиндорын пальто, ороолт зэрэг Харри Поттерын цувралын эд зүйлс ч тавигдах аж.

Г.Бямбасүрэн