Хэллоуин баяр тэмдэглэхээр Итэвонд цугласан олны хөлд дарагдан 156 хүн амиа алдаж, 151 хүн гэмтэж бэртсэн хэрэг өнгөрсөн долоо хоногт гарсан. Хэт давчуу энэ гудамжинд 100 орчим мянган хүн цуглан, аюултай нөхцөл үүссэн үед 30 гаруй хүний амийг гадаадын гурван иргэн аварчээ.

Ийнхүү олон хүний амь аварч баатар болсон хүмүүс нь АНУ-ын цэргүүд байсан талаар аврагдсан зарим хүн гэрчилснийг Ёнхад агентлаг дамжуулсан байна. Амь аврагдпсан хүмүүсийн нэг, 20 гаруй настай, Чонжуд амьдардаг гэх нэгэн залуу Ёнхап агентлагт ярихдаа хүмүүсийн амийг аварсан гурван баатар нь Сөүл хотоос хойд зүгт 50 км зайд байх Тондучон дахь Кэмп-Кейси баазад алба хаадаг Америкийн цэргүүд байсан хэмээн онцолжээ. 

Түүний өгүүлснээр, Итэвоны давчуу гудамжинд хүмүүс шахцалдаж, дарагдаж байх үеэр хэн нэгэн татаж гаргасан бөгөөд тэрбээр үүний дараа ухаан алдсан байна. Баатарлаг үйл хийсэн хүмүүс нь 40 настай Жармил Тейлор, 34 настай Жером Огаста, 32 настай Дейн Битхард байсан гэнэ. Тухайн үед олон хүний амь аварсан хүмүүсийг хэн байсныг хүмүүс мэдээгүй, харин байдал намжсаны дараа хүмүүс аврагчдаа эрэн хайж олжээ.

Мөн энэ цэргүүд AFP агентлагт ярилцлага өгсөн байхыг нь хараад хүмүүс таньсан гэнэ. Цэргүүд AFP агентлагт ярилцлага өгөхдөө шахцалдсан хүмүүс дундаас хүмүүсийг аврахын тулд хэдэн цаг ажилласан, хүмүүсийг аюулгүй газар хүргэн, эмч нар амийг нь аврахад тусалсан хэмээжээ. 

Амь аврагдсан өөр нэг залуугийн ярьснаар, хүмүүс шахцалдаж, байдал хүндэрсэн үед түүнийг өнгөт арьст хүчтэй нэгэн эр "талбайгаас цагаан лууван суглаж байгаа мэт суга татан гаргасан" хэмээн ярьсан байна. Мөн амийг нь аварсан америкчуудтай уулзаж, талархсанаа илэрхийлэхийг хүсэж байгаагаа хэлээд тэд хүмүүсийг аварснаар хохирогчдын тоо багассан гэж онцолжээ.

Г.Бямбасүрэн