Буриадын нийслэл Улаан-Үд хотод 11 дүгээр сарын дөрөвний өдөр дайн эсэргүүцсэн жагсаал болж, цагдаагийнхан найман хүнийг саатуулсан талаар "ОВД-Инфо" мэдээлжээ. 

Эх сурвалжийн мэдээлснээр, Ард түмний эв нэгдлийн өдөр Улаан-Үд хотын төв талбай дээр эрх баригчдыг дэмжсэн жагсаал болохоор төлөвлөж байсан гэнэ. Харин үүнээс хэд хоногийн өмнө Буриадын сөрөг хүчний идэвхтнүүд энэ жагсаалд саад болохоор шийдэж, "Миний аавыг битгий үхүүлээч" нэртэй эсэргүүцлийн жагсаалыг мөн төв талбай дээр зохион байгуулна гэж мэдээлжээ. 

Улмаар 11 дүгээр сарын дөрөвний үд дунд цагдаагийнхан хаалттай талбай руу орох гэж оролдсон хүмүүсийг саатуулж эхэлсэн байна. Мөн эрх баригчдыг дэмжсэн жагсаал ч болоогүй аж.

Саатуулагдсан хүмүүсийн дунд байсан Людмила Раднаева болон Татьяна Люфа нарыг цагдаагийнхны шаардлагыг биелүүлээгүй гэсэн заалтаар 3000 рублиэр торгосон бол Владимир Платошин гэх өөр нэг идэвхтнийг Оросын Зэвсэгт хүчний нэр хүндэд халдсан гэсэн хэргээр протокол үйлджээ. Тэрбээр "Дайн эсэргүүцэж байна" гэсэн зурагт хуудас барин, талбай дээр ганцаарчилсан эсэргүүцэл илэрхийлснээр ийм шийтгэл хүртсэн гэнэ.

" Дайн эсэргүүцсэн цуглаан болно гэдгийг телеграмаас олж мэдсэн. Үүнд нэгдэж, үзэл бодлоо хэлье гэж бодсон, учир нь тэвчих ямар ч боломжгүй боллоо. Миний танил, найз нөхөд, ойр дотныхныг армид татсан, зарим нь дайчлагдсан бол заримыг нь хүчээр шахам л авч явсан юм. Өнгөрсөн зун ангийнхаа хэд хэдэн залууг оршуулсан, харин наймдугаар сард багын найзаа оршууллаа. Энэ бүхэн энэ дайнаас л болж байгаа юм. Хүмүүсийг тийшээ битгий явуулаасай гэсэн дээ би үгээ хэлсэн" хэмээн Платошин Сибирь.Реалии сонинд ярьжээ. 

Эргэн сануулахад, Орост есдүгээр сарын 21-ний өдөр дайчилгаа зарласны дараа ОХУ даяар эсэргүүцлийн хөдөлгөөн өрнөж байлаа. Энэ үеэр Оросын 33 хотод 796 хүн саатуулагдсан байна. Харин Буриадад 10 орчим хүн саатуулагдаж байв. Украинд хийж буй дайнд буриадуудыг илүүтэй татаж байгаа, энэ нь үндэстнийг хомроглон устгаж байгаа хэрэг гэж Буриадын идэвхтнүүд удаа дараа мэдэгдэж, Буриадад төдийгүй гадаадын орнуудад ч эсэргүүцлийн арга хэмжээ зохион байгуулж байлаа. 

ОХУ-ын хамгийн буурай субъектүүдийн нэг гэгддэг Буриад улс ердөө нэг сая хүрэхгүй хүн амтай. Харин эндээс татагдан явсан цэргүүдээс хэдийнэ 305 хүн амиа алджээ. Мөн Улаан-Үд хотод өдөр бүр шахам цэргийг сүүлчийн замд нь үдэх ёслол болдог, зай талбай хүрэлцэхгүй тул хүүхдүүд спортоор хичээллэдэг спортын ордны нэг талд шарилыг байршуулдаг гэж Тайга.инфо мэдээлж байлаа

Буриад залуус дайнд ийнхүү амиа алдаж байгааг эсэргүүцсэн Буриадаас гаралтай залуус нэгдэн "Чөлөөт Буриад" нэртэй олон улсын, дайныг эсэргүүцэх сан байгуулсан талаарх мэдээлэл дөрөвдүгээр сард гарч байсан юм. Энэ сангийнхан дайныг зогсоох, Кремлийн суртал ухуулгатай тэмцэх, буриадуудыг "Орос ертөнцийн гол хамгаалагч" гэдэг байдлаас салгах зэрэг хэд хэдэн зорилго дэвшүүлжээ.

Санг үүсгэн байгуулагчдын нэг, сэтгүүлч Гармажаповагийн өгүүлснээр Буриадын залуус мөнгө олохын тулд хойд зүг рүү ажиллахаар явах, эсвэл гэрээт цэргийн алба хаадаг, ингэснээр ипотекийн зээлд хамрагдаж, орон байртай болж чаддаг гэнэ. 

Г.Бямбасүрэн