Украины нийслэл Киев хотын сургуулийн өмнөх болон ерөнхий дунд боловсролын сургалтын хөтөлбөрөөс орос хэлийг хасчээ. Ийм шийдвэрийг Киев хотын зөвлөл 11 дүгээр сарын 10-ны өдөр гаргасан гэж зөвлөлийн хэвлэлийн алба мэдээлсэн байна. 

Оростой сөргөлдөөнтэй байгаа үед Киев хотын нутаг дэвсгэр дээрх төрийн өмчийн сургууль, цэцэрлэгт "орос хэлийг заах нь зохисгүй, буруу үйлдэл" хэмээн Боловсрол, шинжлэх ухааны асуудал эрхэлсэн комиссын дарга Вадим Васильчук мэдэгджээ. Түүний өгүүлснээр, орос хэл заахыг хориглох нь нийгэмд хурцадмал байдал даамжирахаас сэргийлж, Киевийн боловсролын орон зайд Оросын нөлөөллөөс хамгаалах боломжийг олгох гэнэ.

Өмнө нь, Украины Боловсролын яам орос хэл, Оросын утга зохиолын хичээлийг сургуулийн хөтөлбөрөөс хасах шийдвэрийг наймдугаар сарын 16-ны өдөр гарагж байлаа. Түүнчлэн Оросын цэргийг магтан дуулсан орос зохиолчдын бүтээлүүдийг сургалтын хөтөлбөрөөс хасахаар төлөвлөж байгаа аж. 

Г.Бямбасүрэн