ОХУ-д есдүгээр сард зарлагдсан хэсэгчилсэн дайчилгааны хүрээнд Новосибирск мужаас дайчлагдсан эрчүүд тэргүүн шугаманд байлдахаас татгалзаж, ар тал руу илгээх хүсэлт гаргажээ. Энэ талаар дайчлагдсан хоёр эрийн ар гэрийнхэн НГС хэвлэлд мэдээлсэн байна. 

Дайчлагдсан эрчүүдийн өгүүлснээр, тэд байнгын буу, дэлбэрэлтийн чимээн дор байгаа, цэргүүд хоноглохын тулд хаягдсан байшин олсон, тусгайлсан бэлтгэл хийгээгүй гэнэ. Мөн байлдааны талбарт командлагчдаас тушаал ирээгүй, түүнчлэн цэргүүдэд хангамж өгөөгүй байна. Цаашид хэрхэхээ мэдэхээ больсон цэргүүд 11 дүгээр сарын наймны өдөр рапорт бичиж, албаа цааш үргэлжлүүлэн хаах боломжгүй байгаагаа илтгэжээ.

Мөн цэргүүд цэргийн прокурорын газар хандсан гэнэ. Тэднийг анх дайчлахдаа ар талд үүрэг гүйцэтгүүлнэ гэж хэлсэн ч байлдааны ажиллагаа өрнөж буй талбар руу явуулжээ. Ийнхүү фронт руу илгээхдээ зохих бэлтгэлийг хангаагүй гэж үзсэний улмаас дайчлагдсан эрчүүд ийнхүү рапорт бичсэн байна.

Г.Бямбасүрэн