Америкийн тэрбумтан Илон Маск Твиттер олон нийтийн сүлжээг худалдан авсныхаа дараа удирдлагуудыг нь халж, ажилтнуудад хатуу шаардлага тавьж байгаа талаарх мэдээлэл гарсан. Илон Маск нэн хатуу нөхцөл тавьсны улмаас олон зуун ажилтан ажлаасаа өөрийн хүсэлтээр халагдахаар болжээ. 

Нью-Йорк Таймс сонины мэдээлснээр, хэд хоногийн өмнө Илон Маск Твиттерийн ажилтнуудад цахим шуудангаар захидал илгээсэн байна. "Та нар шинэ Твиттерийн нэг хэсэг баймаар байгаа бол дараах линкээр орж "Тийм" гэсэн товчийг дараарай" гэсэн захидлыг ажилтнууд хүлээн авчээ. Энэ захидалд Маск өөрийн шаардлагын талаар дэлгэрэнгүй бичээгүй ч "маш шургуу, эрч хүчтэйгээр удаан ажиллана. Гагцхүү нэн үр бүтээмжтэй байж үнэлэгдэнэ" хэмээн Маск мэдэгдсэн байна. 

Ингээд шинэ хатуу шаардлагыг хүлээн зөвшөөрөх, эсвэл ажлаасаа халагдах гэсэн сонголт үлдээж, шийдээ гаргахад нь хоёр хоногийн хугацаа өгчээ. Маскийн шаардлагыг хүлээн авч чадахгүй гэж үзсэн олон хүн ажлаас халагдах өргөдлөө өгсөн байна. Одоогоор чухам хичнээн хүн халагдахаар болсон талаарх мэдээлэл гараагүй аж.

Г.Бямбасүрэн