Монгол Улсын Ерөнхийлөгч У.Хүрэлсүх БНХАУ-д айлчлахаар болсон. Тэрбээр 11 дүгээр сарын 27-28-ны өдөр БНХАУ-д төрийн айлчлал хийх юм. Энэ айлчлалын талаар БНХАУ-ын Гадаад хэргийн яам байр сууриа илэрхийлснийг Синхуа агентлаг дамжуулжээ. 

Монгол Улсын Ерөнхийлөгчийн ирэх айлчлалыг БНХАУ  хоёр талын стратегийн итгэлцэл, бодит хамтын ажиллагааг гүнзгийрүүлэх боломж болгон ашиглахаар төлөвлөж байгаа гэж БНХАУ-ын Гадаад хэргийн яамны албан ёсны төлөөлөгч Жао Лижянь мэдэгдсэн байна. 

"Энэхүү айлчлалыг хамтын стратегийн итгэлцэл, бодит хамтын ажиллагааг гүнзгийрүүлэх боломж болгон ашиглаж, найрсаг хөршийн харилцааны жишээг харуулан, Хятад, Монголын харилцааг шинэ төвшинд гаргана гэж БНХАУ найдаж байна" хэмээн хэвлэлийн бага хурлын үеэр Жао Лижянь мэдэгджээ. Энэхүү айлчлалын үеэр албан ёсны хэлэлцээ хийж, хамтын ажиллагааны багц баримт бичиг гарын үсэг зурна гэж Хятадын талын төлөөлөгч мэдэгдсэн байна.

Түүнчлэн айлчлалын үеэр Монгол Улсын Ерөнхийлөгч У.Хүрэлсүх БНХАУ-ын Төрийн зөвлөлийн Ерөнхий сайд Ли Көцян, Бүх Хятадын ардын төлөөлөгчдийн хурлын Байнгын хорооны дарга Ли Жаньшу нартай тусгайлан уулзахаар төлөвлөжээ.

Харин хоёр орны төрийн тэргүүнүүд хоёр талын харилцааг хэлэлцэж, талуудын ашиг сонирхлыг агуулах олон улсын төдийгүй бүс нутгийн асуудлаар байр сууриа илэрхийлэн, Хятад , Монголын харилцааны хөгжлийн цаашдын чиг хандлагыг тодорхойлно гэж БНХАУ-ын Гадаад хэргийн яам онцолсныг Синхуа агентлаг дамжуулсан байна.

Энэ айлчлал нь Монгол Улсын өнөөгийн Ерөнхийлөгч Хятадад хийж буй анхны айлчлал болох бөгөөд энэ нь Хятад Монголын хоорондын нягт харилцааны найрсаг уламжлал өндөр төвшинд үргэлжилж байгааг илэрхийлэхийн дээр иж бүрэн стратегийн түншлэлийн харилцаа өндөр төвшинд байгааг харуулна хэмээн БНХАУ ГХЯ цохон тэмдэглэжээ.

Өмнө нь У.Хүрэлсүх 2018 онд Ерөнхий сайдын хувиар Хятадад албан ёсны айлчлал хийж байв.

Г.Бямбасүрэн