Эрчим хүчний зохицуулах хорооноос зохион байгуулж буй Эрчим хүчний хүрэлцээ ба хэмнэлт өнөөдөр болж байна. Өнөөдрийн байдлаар эрчим хүчний салбар 1.6 их наяд төгрөгийн борлуулалттай, өр төлбөр нь 1 их наяд 80 тэрбумд хүрчээ. Жилдээ зээлийн хүүнд 60 гаруй тэрбум төгрөгийг төлж байна.

Зөвлөгөөнийг нээж Эрчим хүчний сайд Б.Чойжилсүрэн үг хэллээ. Тэрбээр:

...Тавантолгой цахилгаан станц, ТЭЦ 3-ын өргөтгөл, Амгалангийн ДЦС-ын өргөтгөл, Бөөрөлжүүт болон Багануурт барих шинэ ЦС, Эрдэнэбүрэнгийн УЦС барих төслүүдийн хэрэгжилт төлөвлөгөөний дагуу явагдаж байгаа ч цахилгаан,дулааны хэрэглээний өсөлтийг гүйцэх хэмжээнд хурдан хийгдэж чадахгүй байна.

Эрчим хүчний үйлдвэрлэл, хэрэглээний баланс алдагдаж, нийлүүлэлтийн хомстол үүсэж байгаа нь бусад салбаруудын үйл ажиллагааг хязгаарлаж, нийт эдийн засгийн бүтээмжид сөргөөр нөлөөлж байна.

...Бид эрчим хүчний салбарын санхүү, эдийн засгийн хүндрэлтэй холбоотой бугшсан асуудлыг дан ганц үнэ тарифийг нэмэх замаар шийдвэрлэж чадахгүй. Харин хуучирсан технологи, үр ашиггүй байдлыг халж, үйлдвэрлэл, дамжуулалт, түгээлт, хэрэглэгчийн бүх шатанд хэмнэлт хийх нь өдрөөс өдөрт өсөн нэмэгдэж буй эрэлт хэрэгцээг хангахад бодит хувь нэмэр болно.

Цаашид бид хэмнэлтийн бодлогыг хэрэглэгчид хэрэглээндээ өөрөө тохируулга хийдэг цахилгаан, дулааны зохистой хэрэглээг дэмжсэн төлбөрийн ухаалаг, соёлтой, зөв тогтолцоотой уялдуулах шаардлагатай байгааг хэллээ.

Мөн тэрбээр эрчим хүчний салбар 2023, 2024 оны хэмнэлтээр давна. Салбарын бүх байгууллага шаардлагагүй бүх зардлыг тэвчиж, хэмнэлтийн горимд ажиллана гэдгийг хэлэв.

Э.Түвшинчулуун: Эрчим хүчний эх үүсвэрийн дутагдлыг хэмнэлтээр нөхөх шаардлага тулгарч байна  

Эрчим хүчний зохицуулах хорооны дарга Э.Түвшинчулуун: Цахилгааны, дулааны эрчим хүчний хэрэглээ жилд дундажаар 7-8 хувиар тогтмол нэмэгдэж, төвийн бүсийн эрчим хүчний сүлжээний цахилгааны оргил ачаалал 2021 онд 1387 мВт байсан бол өчигдөр оройны байдлаар 1427 мВт болж өсөж байна.

Бид эрчим хүчний хэрэглээний 78 хувийг дотоодын эх үүсвэрээс, 22 хувийг ОХУ-аас импортоор хангаж байна.

Өвлийн их ачааллын үед ДЦС-ууд бүрэн хүчин чадлаараа ажиллаж, үндсэн тоноглолын гэнэтийн зогсолтын үед хэрэглэгчдийг хязгаарлах техникийн арга хэмжээ авч болзошгүй нөхцөл бидний өмнө тулгараад байна.

Улаанбаатар хотын төвлөрсөн дулаан хангамж 2022-2023 оны өвлийн улиралд  дулааны хэрэглээ эх үүсвэрүүдийн суурилагдсан хүчин чадлаас 1085.3 ккал цаг буюу 46 хувиар хэтэрсэн ачаалалтай ажиллаж байна.

...Үнэ тарифийг инфляцид огцом нөлөө үзүүлэхгүй байдлаар зохицуулж, ААНБ-ын тарифийг 21 хувиар нэмэгдүүлээд байна.

Эрчим хүчний салбарт томоохон эх үүсвэр баригдаж, ашиглалтад орох хугацаанд буюу ирэх 4-5 жилд эх үүсвэрийн дутагдлыг хэмнэлтээр нөхөж, үр дүнд хүргэх хэрэгцээ шаардлага үүсэж байгааг онцоллоо.

Г.Балжинням: 770 мянган суудлын машины 20 хувийг цахилгаан машинаар солиход 1000 МВт нэмэгдэнэ

Диспетчерийн үндэсний төв ТӨХХК-ийн гүйцэтгэх захирал Г.Балжиннямын эрчим хүчний өнөөгийн нөхцөл байдлын талаарх илтгэлийн онцлох ишлэлүүдийг хүргэж байна. 

-Төвийн бүсийн эрчим хүчний системийн оргил ачаалал 2021 онд 1387 МВт байсан бол өчигдөр орой /2022.11.28/ны байдлаар 1427 МВт болж өссөн.

-Оргил ачааллын үед гадаа 1 хэмээр хүйтрэхэд 10 МВт-аар нэмэгддэг.

-Даваа, баасан гаригт эрчим хүчний хэрэглээ бусад гаригуудаас маш өндөр болдог бол амралтын өдрүүдэд цахилгаан эрчим хүчний хэрэглээ харьцангуй бага байдаг.

-Цагаан сарын шинийн нэгний өглөө эрчим хүчний хэрэглээ оргил ачаалалд хүрдэг. 03 дугаар сарын 18 буюу Цэргийн баяраар эрчим хүчний хэрэглээний хоногийн ачаалал нэмэгддэггүй. Бусад бүх баяраар хоногийн ачааллын график өөрчлөгддөг.

-Оргил ачаалал өвлийн улиралд 19.00-21.00 цагт байдаг бол зуны улиралд өдөр 11.00-12.00 цагт хүрдэг. Дэлхийн дулааралтай холбогдуулан хөргөлтийн систем их ашигладаг болсноор зуны улиралд өдрийн цагаар их ачаалалд хүрдэг.

-2022-2023 онд системийн нийт боломжит чадал 1426 МВт-д хязгааргүй тулж ажиллана. Хэрэглээ үүнээс дээш гарвал аваарын байдалд зогсолт хийнэ. Хэрэглээ тулж, хязгаарлалт хийхэд бэлэн байна.

-Монгол Улсад 521 цахилгаан машин бүртгэлтэй байна. Цахилгаан машиныг цэнэглэх хугацаа нь 5-9 цаг. Үүнд 3.3 МВт эрчим хүч зарцуулдаг. Одоо байгаа 770 мянган суудлын машины 20 хувийг цахилгаан машинаар солиход 1000 МВт нэмэгдэнэ. Оройн их ачааллын үеэр машинаа цэнэглэх магадлал маш өндөр байгаа.