Жил бүр дэлхийн олон оронд шинэ жилийг угтан Санта-Клаусын марафон зохион байгуулагддаг уламжлалтай. Энэ арга хэмжээнд Санта-Клаусын хувцас өмссөн сайн дурынхан нэгдэж, сайн үйлсэд зарцуулах мөнгөн хандив цуглуулахаар гүйдэг юм.

Ийм арга хэмжээ зохион байгуулдаг хотуудын нэг нь Токио. Энэ хотод 12 дугаар сарын дөрөвний өдөр Санта-Клаусын уламжлалт марафон зохион байгуулагджээ. Токио хотноо болсон энэ марафонд 5000 орчим хүн оролцсоны дотор гэрийн тэжээвэр амьтнаа дагуулж ирсэн Санта-Клаус ч байсан гэнэ.

МИР24 телевизийн мээдэлснээр, марафон хоёр зайд болж өнгөрчээ. Хамгийн урт нь 4,5 км бол богино нь хоёр километр зайтай байсан гэнэ. Хамгийн богино зайд хүүхдүүд болон ахмад настай оролцогчид гүйжээ.

Энэ марафонд оролцогчид нь түрүүлэх биш харин буяны үйлсэд зориулах хандив цуглуулах зорилготойгоор оролцдог аж. Марафоны үеэр хандив цуглуулж, шинэ жилийн баярыг эмнэлэгт өнгөрүүлдэг хүнд өвчинтэй хүүхдүүдэд зул сарын баярын бэлэг авч өгдөг уламжлалтай юм байна.

Г.Бямбасүрэн