ОХУ-ын Ерөнхийлөгч Владимир Путин Монгол Улсад суух  шинэ элчин сайдыг томилжээ. Путиний гарын үсэг зурсан холбогдох тушаал Оросын эрхзүйн мэдээллийн портал дээр нийтлэгдсэн байна. 

"Евсиков Алексей Николаевичийг ОХУ-аас Монгол Улсад суух Онц бөгөөд Бүрэн эрхэт элчин сайдаар томилсугай" хэмээн Путиний зарлигт өгүүлжээ.

Путин мөн өдөр өөр нэг тушаал гаргаж Искандер Азизовыг Монгол Улсад суух элчин сайдын албанаас чөлөөлсөн байна. Түүнийг нутаг буцах болсон талаарх мэдээлэл 2022 оны 12 дугаар сарын сүүлээр Монголын хэвлэлүүдээр гарч байв. Азизов 2013 оноос хойш Монголд суух элчин сайдаар ажилалж байлаа. 

Шинэ томилогдсон элчин сайд Алексей Евсиков Москвагийн олон улсын харилцааны улсын дээд сургуулийг төгссөн. Гадаад хэргийн яамны системд 1984 оноос эхлэн ажилалж байгаа аж. 2015-2019 оны хооронд Шанхай дахь Оросын Ерөнхий консул, харин 2019 оноос Гадаад хэргийн яамны онцгой даалгаврын элчингээр ажиллаж байгаа юм байна.

Г.Бямбасүрэн