Олон нийтийн сүлжээнд хүний эрхийг хамгаалах тухай хуульд Ерөнхийлөгч хориг тавиад байна. Хуулийг санаачлагч, ЦХХХ-ны сайд Н.Учрал байр сууриа илэрхийлэв. Тэрбээр “Үндсэн хуулиар олгогдсон бүрэн эрхийнхээ хүрээнд Ерөнхийлөгч хориг тавьсан байна. Ерөнхийлөгчийн хоригийг хүндэтгэн хүлээж авч байна.

Миний хувьд Засгийн газраас өргөн мэдүүлсэн хуулийг Хууль тогтоомжийн хуулийн дагуу УИХ-аар хэлэлцүүлсэн. Процетурын алдаа гарсан, олон нийтийн байгууллагын санал шүүмжийг тусгаагүй, эрх ашиг нь зөрчигдөж байгаа этгээдүүдийн санал бодлыг тусгах шаардлагатай гэсэн Ерөнхийлөгчийн хоригийн үндэслэлийг хүлээж авч байна.

Би үзэл санаа, үнэт зүйлээсээ ухраагүй. Цахим залилан 99.8 хувиар өссөн. Цахим орчин дахь гэмт хэрэг 3.8 дахин нэмэгдсэн байна. Нэг жилийн дотор 18 тэрбум төгрөгийн хохирол учирсан тоон үзүүлэлт байгаа. Иргэдийн эрх ашгийг хамгаалах гэсэн эхний алхам нь энэ хууль. Цаашид бид иргэдийн эрх ашгийг хамгаалах ажлыг тасралтгүй явуулах ёстой" гэсэн байр суурийг илэрхийллээ. 

Мөн тэрбээр энэ хууль ямар ач холбогдолтой байсныг цаг хугацаа харуулж, гэрчилнэ гэдгийг хэлэв.