Өвөрхангай аймгийн Хархорин сум дахь Сум дундын шүүхийн шийдвэр шүүхийн шүүгчийн бэлтгэсэн тоймыг хүргэе. 

Прокуророос Б нь бага насны хохирогч Э-г хүчиндсэн гэх гэмт хэрэгт яллах дүгнэлт үйлдэж шүүхэд шилжүүлжээ. Хэрэгт авагдсан, шүүхийн хэлэлцүүлэгт шинжлэн судалсан баримтуудаар шүүгдэгч Б нь бага насны хохирогч Э-г хүчиндсэн болох нь нотлогдон тогтоогдсон байна. 

Гэмт хэргийн хохирогч болон түүний хууль ёсны төлөөлөгч нь яллагдагч, шүүгдэгчийн хамаарал бүхий нөлөөнд орсон, хараат байдалд байгаа /гэр бүлийн амьжиргааг залгуулдаг, хууль ёсны төлөөлөгч гэр бүл, төрөл садныхаа нэр хүндийг хамгаалах зорилгоор хохирогчид нөлөөлөх, дарамтлах .../ тохиолдолд хохирогчийн эрх ашгийг бүрэн төлөөлж чадах эсэх нь эргэлзээтэй байдаг тул хөндлөнгийн хүүхдийн эрхийг хамгаалах байгууллагаас хууль ёсны төлөөлөгчийг томилж хэрэг хянан шийдвэрлэх ажиллагаанд, шүүх хуралдаанд оролцуулдаг.

Бага насны хохирогчийн хууль ёсны төлөөлөгчөөр Өвөрхангай аймгийн гэр бүл, хүүхэд залуучуудын хөгжлийн газрыг тогтоож, тус газрын хүүхдийн эрх, хамгаалал хариуцсан ахлах мэргэжилтэн, хүүхдийн эрхийн улсын байцаагчийг шүүх хуралдаанд оролцуулав.

Шүүхээс шүүгдэгч Б-г бага насны буюу 11 настай хохирогчийн эсрэг хүчиндэх гэмт хэргийг үйлдсэн гэм буруутайд тооцож, 13 жилийн хугацаагаар хорих ял оногдуулж шийтгэв.

Тоймыг бэлтгэсэн: Өвөрхангай аймгийн Хархорин сум дахь Сум дундын шүүхийн шүүгч Э.Дулмаа