Засгийн газраас яаралтай горимоор эхэлж, гурван жилийн хугацаанд ашиглалтад оруулахаар төлөвлөсөн Богдхан төмөр замын ажил нам гацаад байна. Монгол Улсын тээвэр ложистикийн өрсөлдөх чадварыг нэмэгдүүлэх, Улаанбаатар хотын төвлөрөл, түгжрэлийг бууруулах, Төв аймагт дагуул хотуудыг бий болгох зэргээр ач холбогдлыг нь өндөрт өргөөд байсан төмөр замын ажил яагаад гацсан нь шийдвэр гаргагчид болоод улс төрийн асуудал биз.

Гол асуудал нь сүржин нээлтийн араас төмөр замын доод бүтцийн газар шорооны ажилд ханцуй шамлан орсон аж ахуйн нэгжүүд хийсэн ажлынхаа хөлсийг авч чадахгүй өнөөдрийг хүрч, бүтэн жил тойрч байна. Төмөр замын доод бүтцийн ажил хийх гэрээ байгуулж,  2022 онд хийх ёстой бүх ажлаа гүйцэтгэсэн 15 компани дампуурлын ирмэгт тулаад байна, С.Бямбацогт сайд аа!

Тэд гэрээний дагуу хийх ёстой ажлаа хийсэн. Харин одоо гэрээний дагуу ажлын хөлсөө авахаар Тавантолгой Төмөр Зам ХХК-ийн гадаа цуглаан зарлаж, суулт хүртэл хийлээ. Тавантолгой төмөр зам ХХК-ийн Бүрэн эрхт төлөөлөгч Н.Мягмарт энэ асуудлыг шийдэх сэтгэл, эрх мэдэл ч үгүй бололтой.

Ганцхан хоногийн өмнө Засгийн газар Шивээхүрэн-Сэхээ боомтын төмөр зам барих шийдвэр гаргаж, Зам тээврийн хөгжлийн сайд С.Бямбацогт олон нийтэд танилцууллаа. Шинэ замын ажил эхлэхээсээ өмнө хэдийнэ тавьчихсан замын холбох цэг, хийчихсэн ажлын гэрээний төлбөрийг шийдвэл яасан юм бэ,  С.Бямбацогт сайд аа!

Засгийн газар “Шинэ сэргэлтийн бодлого” хэрэгжүүлж, төрийн ажлыг хувийн хэвшилд даатгана, тэднийг дэмжинэ гэдэгт ч үнэн хэрэгтээ ажлаа хийлгэчихээд хулхидаад байвал төрийн ажил урагшлах уу? Холбох цэггүй нам гацсан төмөр замууд шиг мухардах биш үү!

Б.Хэрлэн