Бразилын Ерөнхийлөгч Луис Инасиу Лула да Силва  Еврокомиссын тэргүүн Урсула фон дер Ляйентай уулзжээ. Тэрбээр энэ уулзалтын үеэр Орос, Украины сөргөлдөөнд цэргийн шийдэл гэж байхгүй хэмээн мэдэгдсэн талаар Коммерсант мэдээлсэн байна.

Эх сурвалжийн мэдээлснээр, Украин, Палестин, Йеменд дипломат хүчин чармайлтыг нэмэгдүүлэхийг тэрбээр уриалж, бүхий л талд олон улсын эрхзүйн үндсэн зарчим үйлчлэх ёстой гэж цохон тэмдэглэжээ.

"Европын зүрхэнд дайн эргэн ирсэн нь өнөөдөр бидний өмнө тулгарч буй хүндхэн сорилтуудыг бидэнд сануулж байна. Энх тайвныг эрэн хайх, хурцадмал байдал, тоо томшгүй үр дагавартай хүч хэрэглэх үйлдлээс зайлсхийх оролдлогын талаар би өмнө нь сануулж байсан. Украин, Палестин, Йеменд аль болох их дипломат арга хэрэглэж, цэргийн аргаас зайлсхийх хэрэгтэй" хэмээн  Лула да Силва мэдэгджээ.

Өмнө нь тэрбээр Украины сөргөлдөөнийг дипломат арга замаар шийдэхийн төлөөх байр сууриа нэг бус удаа илэрхийлж байлаа. Лула да Силва хэлэлцээр явуулахын тулд G20-той адил бүлэг байгуулахыг санал болгож байв.

Г.Бямбасүрэн