УИХ дахь Ардчилсан  намын бүлэг үдээс өмнөх байнгын хороодын хурлаас завсарлага авах даа МАН-ын дарга Ө.Энхтүвшин аймшигтай мэдээлэл хийсэн. Тиймээс манай намын бүлэг түүний мэдэгдлийг бүлгийн хуралдаанаараа хэлэлцэнэ гэдгээ мэдэгдсэн. “1995 оноос өмнө тэтгэврээ тогтоолгосон иргэдийн тэтгэврийн зөрүүг арилгах хуулийн төсөл дээр УИХ дахь Ардчилсан намын бүлэг саад учруулж байна” гэсэн Ө.Энхтүвшин дарган мэдэгдлийг няцааж, УИХ-ын гишүүн С.Эрдэнэ, П.Алтангэрэл нар сэтгүүлчдэд хандлаа. Тэд “Тэтгэврийн зөрүүг арилгах хуулийн төслийг Ардчилсан намын бүлгийн гишүүд санаачилж, 2011 оны наймдугаар сард УИХ-д өргөн мэдүүлсэн байсан. Мөн шаардлагатай хөрөнгийн эх үүсвэрийг 2012 оны нэгдсэн төсөвт тусгуулахаар заагаад байсан. Тэгтэл УИХ-ын даргын дэргэдэх зөвлөлийн хуралдаанаас хуулийн төслийн хэлэлцүүлгийг хойшлуулах шийдвэр гаргасан байсан. Мөн шаардлагатай хөрөнгийн эх үүсвэрийг Монгол Улсын 2012 оны төсөвт тодотгол хийх үеэр суулгах нь зөв гэж үзсэн. Бүлгийн хувьд асуудалд нааштайгаар хандсан. Улмаар МАН-ын бүлгийн гишүүд шинэ он гарахын өмнөхөн бидний өргөн барьсан төсөлтэй агуулгын хувьд ижил төслийг өргөн мэдүүлсэн. Гэвч хамтад нь хэлэлцээд явъя гэж шийдсэн. Ингээд байж байтал дахиад Суурь тэтгэврийн тухай хуулийн төсөл гэдэг юмыг оруулж ирсэн. Тийм учраас бидний хувьд асуудал тавихаас аргагүйд хүрсэн”  гэв. Мөн “1995 оноос өмнө тэтгэврээ тогтоолгосон иргэд дээр улстөрийн тоглолт битгий хийгээч ээ. Тэд олон жилийн турш төрд гомдолтой явж ирсэн, гомдлыг нь тайлъя л гэж шийдсэн. Ийм юмаар улстөр хийх нь өөрөө зохисгүй” гэсэн тайлбарыг хийв.