Pearson English англи хэлний сургалтын хөтөлбөр болон Pearson BTEC олон улсын IT хөтөлбөрийн нээлт өнөөдөр болж байна. Нээлтийн арга хэмжээг БШУ-ны сайд Л.Энх-Амгалан эхлүүлж үг хэллээ. 

БШУ-ны сайд Л.Энх-Амгалан

Энэ хичээлийн жилийн онцлог бол боловсролын салбарт шинэ эрхзүйн орчин бүрдэж, боловсролын тэгш байдал чанар хүртээмжинд шинэчлэлийг  эхлүүлэх гарааны жил болж байна. Хот хөдөөгийн сургууль, хувийн болон төрийн сургуулийн ялгааг арилгаж гэрт ойр сургуулийг хамгийн сайн сургууль болгохын төлөө боловсролын шинэчлэлийг эхлүүлж байгаа билээ. 

Бидэнд боловсролын шинэ зорилготойгоо уялдуулан орчин үеийн боловсролын шинэ хандлага, технологын дэвшил инновацид хурдан суралцах, хэрэглэх зайлшгүй хэрэгцээ бий болж байна. Энэ хичээлийн жилд бид ерөнхий боловсролын болон мэргэжлийн боловсролын салбарт хоёр чухал шинэчлэлийг эхлүүлэхээр өнөөдөр нээлтийн ажиллагаагаа хийж байна. Үүний нэг нь ЕБС-д хэрэгжих Рearson Еnglish хөтөлбөр юм. 

УИХ-аас энэ оны долдугаар сард ёсчлон баталсан Боловсролын ерөнхий хуульд сургалтын үндсэн гадаад хэл нь англи хэл байхаар заасан. Монгол Улсын Засгийн газрын 2021 оны 372 дугаар тогтоолоор бүх нийтийн англи хэлний суралцахуйг дэмжих арга хэмжээг 2023-2025 онд хэрэгжүүлэхээр шийдвэрлэсэн билээ. Уг тогтоолыг хэрэгжүүлэх ажлын хүрээнд манай яамнаас өнгөрсөн хичээлийн жилд сургалтын агуулга нь олон улсын жишигт нийцсэн цахим платформд суурилсан багшийн хөгжил, сурагчийн сурлагын ахицыг дээшлүүлэх аргачлал бүхий “Pearson English" англи хэлний цогц хөтөлбөрийн туршилтыг 38 сургуулийг хамарч хийсэн.

Энэхүү туршилтад хамрагдсан сургуулийн 5-9 дүгээр ангийн туршилтын бүлгийн суралцагчдын англи хэлний мэдлэг чадварын гарааны дундаж үнэлгээ 29.3 хувь байсан бол туршилтын дунд 47.4 хувь болж өслөө.

Сурагчдын англи хэлний ярих, сонсох, бичих чадвар жигд хөгжиж хичээлдээ сонирхолтой сурах идэвх чармайлт нь нэмэгдсэн, англи хэлний багш нарын арга зүйн чадвар дээшилсэн гэж тайланд дүгнэсэн байна. Иймд бид 2023-2024 оны хичээлийн жилд дараах арга хэмжээг хэрэгжүүлэхээр төлөвлөн ажиллаж байна. “Pearson English” англи хэлний сургалтын цогц хөтөлбөрийг нэгэнт туршиж үр дүнг нь гаргасан 5-6 дугаар ангийн хөтөлбөрийг ЕБ-ын нийт 688 сургуульд хэрэгжүүлэхээр болж байна. Өмнөх туршилтад хамрагдсан 38 сургуульд 7-9 дүгээр ангийн туршилтыг хэрэгжүүлнэ. Багш нарын цахим ур чадвар “Рearson English Connect” платформд хичээл сургалт явуулах арга зүйд суралцах, сургалт, гарын авлага, зөвлөмжөөр хангах ажлыг үе шаттайгаар зохион байгуулна" гэв.