“Нүүрсний” гэх тодотголтой хэрэгт яллагдагчаар татагдсан УИХ-ын гишүүн асан Т.Аюурсайхан, "Эрдэнэс Тавантолгой"-н Гүйцэтгэх захирал асан Б.Ганхуяг нарын 11 хүнд холбогдох хэргийн урьдчилсан хэлэлцүүлгийн шүүх хурал  болж байна. 

Шүүх хуралдааны эхэнд "Эрдэнэс Тавантолгой"-н Гүйцэтгэх захирал асан Б.Ганхуяг "11 хүнд холбогдох хэргийн урьдчилсан хэлэлцүүлэг болж байна. Энэ хэрэг дотор надтай холбоотой 6 үйлдэл байгаа. Энэ 6 үйлдэл дотор нэг шанага ч нүүрсний асуудал байхгүй. 2023.12.08 өдөр цагдан хорьсон. Цагдан хорьсон прокурорын тогтоол дээр жагсаал цуглаан зохион байгуулсан, турхирсан, санхүүжүүлсэн гэсэн үндэслэл бичсэн байсан. Гэтэл араас нь нүүрсний хэрэг гаргаж ирсэн. Нүүрстэй холбоотой 50,60 хэрэг мэдүүлэг аваад л яваад байсан ч нэг нь ч үлдээгүй. Бүх нүүрсний хэрэг гэдэг зүйл ард үлдсэн. Хаана үлдсэн гэдгийг би мэдэхгүй. Энд байгаа 6 үйлдэл бол хоёр хүнийг танилцуулсантай холбоотой, хөрөнгө оруулсан, хөрөнгө авсан асуудал. Би танилцуулсан учраас хэрэг болгож надад хилсээр тохож байна. Буруутгах нотлох баримтаар нотлож чадаагүй. УИХ дээр нүүрсний хэргийг ярьж байгаа. Гэтэл надтай холбоотой юу ч байхгүй. 11 хүнд холбоотой ямар ч хэрэг байхгүй. Намайг цагдан хорьсон шүүгчийн 19 захирамж гарсан. Үүний 9-ийг Ерөнхий шүүгч Б.Халиун гаргасан.

Яллагдагч миний эрх зүйн асуудлыг дордуулсан маш олон асуудлууд гарсан. АТГ-аас хэргийг шалгаад ирүүлсэн. АТГ-ын шууд даалгавраар ажиллаж байгаа гэж бодож байна. Таны хэрэг ч гэсэн АТГ дээр шалгагдаж байж магадгүй, шүүгчээ. Би шалгуулах эрхтэй. Даалгавар байгаа учраас ямар ч үндэслэлгүй 19 удаагийн захирамжаар хорьж байгаа юм. Эдгээр захирамжууд дээр зайлшгүй цагдан хорих шаардлагатай гэсэн үндэслэлийг дурьдаагүй. Прокурорын тогтоол гараагүй зүйл дээр хүртэл цагдан хорьсон. 

2023 оны тавдугаар сарын 5-ны өдөр Сувд-Эрдэнэ шүүгч миний цагдан хориог болиулсан. Үүнээс 10 минутын дараа Ерөнхий шүүгч давж заалдах шатны шүүх хуралдаан зарласан, ямар ч баримт бичиггүйгээр... Ингээд өмгөөлөгчид аргагүй эрхэнд шүүгчээс татгалзаад, хурал хойшилсон. Тэр хурал хойшилж, намайг гарсны дараа шүүх хурал үргэлжилсэн. Намайг үргэлжлүүлэн хорих хэргийн дугаар, үндэслэл өөр байхад намайг дахин хорьсон. Тухайн үед Хүний эрхийн үндэсний комиссын ахлах мэргэжилтний дүгнэлт, байр суурь маш тодорхой байхад нүдээ аниад л шийдвэр гаргачихсан.

2023 оны наймдугаар сарын 9-ний өдөр хугацаа дуусах захирамжийг өөрчлүүлсэн. Тэр захирамж дээр прокурорын тогтоол гараагүй байхад намайг үргэлжлүүлээд л хорьчихсон. Прокурор " Чингис хаан банктай холбоотой судлагдаж байгаа удахгүй тогтоол нь гарчихна" гэж хэлсэн. 

2023 оны наймдугаар сарын 8-ны өдөр над дээр тогтоол ирсэн. Тогтоол ирэхэд  Тэр үед Б.Халиун шүүгч ажил дээрээ байгаагүй байхад тогтоол дээр туслах юм уу эсвэл өөр нэгэн нь гарын үсэг зурсан. Эрүүгийн хэргийг 2023 оны наймдугаар сарын 1-ний өдөр Прокуророос шүүхэд шилжүүлсэн. Гэтэл наймдугаар сарын 4-ний өдөр шүүгчид хуваарилсан. Үүнийг яагаад шалгаж өгөхгүй байгаа юм бэ? 

Ерөнхий шүүг Б.Халиун шалгагдаж байгаа тухай АТГ-ын комиссараас би өөрөө сонссон. Арай ч үгүй байлгүй дээ гэж бодож байлаа. Шүүгчийн хараат бус байдал гэж байх ёстой. Тиймээс эдгээр шалтгаан нөхцөлүүдийг харгалзаж, тодруулж өгөхийг би хувьдаа хүсч байна" хэмээгээд шүүгчээс татгалзаж байгаагаа мэдэгдлээ. 

Үүний дараа прокурор уг татгалзалд "Татгалзах үндэслэл гэхээсээ илүү хэргийн үйл баримт руу орж ярилаа. Өнөөдөр урьдчилсан хэлэлцүүлгийн шүүх хурал явагдаж байна. Гэм буруугийн асуудал хэлэлцэх шүүх хуралдаан биш гэдгийг хэлэх нь зүйтэй байх. ЭХХШТХ-ын 11 дүгээр зүйлд Шүүгчээс татгалзан гарах үндэслэлийн талаар заасан байдаг. Яллагдагч Б.Ганхуягийн тухайд шүүгчийн энэ хэрэгт хувийн сонирхол байна гэдэг үндэслэлээр татгалзал гаргаад байх шиг байна. Энэ бүгд нотлох баримттай үндэслэл бүхий байх ёстой. Үндэслэлээ тайлбарлаж чадсангүй. Хууль хяналтын байгууллагыг харлуулах зорилгоор нотлох баримтгүй зүйл ярьж байна. Татгалзлалыг хүлээж авахаас татгалзаж шийдэж өгнө үү " гэсэн санал гаргалаа. 

Б.Ганхуягийн өмгөөлөгч Д.Нямдорж "Эрүүгийн хэрэг хянан шийдвэрлэх тухай хуулийн 4.1 дүгээр зүйлд Прокурорын бүрэн эрхийн тухай заасан байгаа. Миний үйлчлүүлэгч бухимдаад байгаа зүйл нь Прокурор Эрүүгийн хэрэгт дугаар өгдөг. Аливаа нэг хэрэгт дугаар өгдөг болохоос биш ТОДОТГОЛ өгдөггүй. Нүүрсний гэх 11 хүнд холбогдох хэрэг гэж шүүгч хүртэл иш татаж байна. Иймээс хувийн ашиг сонирхол бий болоод байна гэж өмгөөлөгчийн зүгээс хардаж байна" гэлээ.