АНУ-ын жүжигчин телевизэд ярилцлага өгч, Украинд хэрхэн ханддаг, Оросын түрэмгийллийг сөрөн зогсоход нь Украинд хэрхэн туслах санаа төрж байсан талаараа ярьжээ. Түүний ярилцлагын хэсгээс  Variety сонин нийтэлсэн байна.

Шон Пенний өгүүлснээр, Оскарын шагнал гардуулах ёслолын үеэр Володимир Зеленскийд үг хэлэх боломж олгоогүйд ихээхэн санаа зовниж байсан гэнэ. Чухам ямар шалтгаанаар үг хэлэх боломж олгоогүйг тэрбээр ойлгоогүй, тиймдээ ч Оскарын баримлаа устгах санаа ч төрж байсан гэж Шон Пенн ярьжээ.

"Ойлгож байна уу, баримлаа Украинд өгье гэж бодсон. Баримлыг хайлуулаад, оросуудыг буудах сум болгож болно шүү дээ" хэмээн Шон Пенн өгүүлжээ.

Гэхдээ үүний дараа, Украинд зориулсан сум болгохын тулд баримлаа өгөхийн оронд Зеленскийд өгье гэсэн шийдэлд хүрсэн гэж тэрбээр онцолсон байна. Тэрбээр энэ ярилцлагынхаа үеэр Украины Ерөнхийлөгчийг ихээхэн хүндэтгэж явдаг гэдгээ онцолжээ. Мөн Зеленский ерөнхийлөгч амь нас нь эрсдэх аюулаас ч айгаагүй, өөрөө амиа алдаж болох ч улс орныхоо тусгаар тогтнолын төлөө тэмцээр байгаагаар нь бахархдаг хэмээжээ. 

Г.Бямбасүрэн