Ирэх оны Ерөнхийлөгчийн сонгуульд Бүгд Найрамдах Намаас нэр дэвшихээр горилж буй, АНУ-ын Ерөнхийлөгч асан Дональд Трамп дэмжигчидтэйгээ хийх уулзалтаа Калифорнид үргэлжлүүлжээ. Айова мужид дэмжигчидтэйгээ уулзахдаа Америкийн цэргүүдийг бусад орнуудаас эргүүлэн татна гэж мэдэгдсэн бол Калифорнид болсон уулзалтын үеэр Жо Байден Ерөнхийлөгч хэвээр үлдвэл "энэ улс мөхнө", дэлгүүр дээрэмдэгчдийг газар дээр нь буудах хэрэгтэй гэх зэрэг мэдэгдэл хийсэн байна.
"Бид нэн даруй бүхий л хулгай, дээрмийг зогсооно. Маш энгийн, та дэлгүүр дээрэмдэх гэж байгаа бол энэ дэлгүүрээсээ гарах үед чинь таныг буудна гэдэгт бэлэн байх ёстой" хэмээн Трамп мэдпэгджээ.
Сонгуулийн өмнөх сурталчилгааны ажилд зориулсан хөрөнгө босгох ажилд Байден Трампаас түрүүлж, илүү их хандив цуглуулсны дараа Трамп гэмт хэрэгтэй тэмцэх хатуу ширүүн аргуудыг санал болгож, олныг өөртөө татах гэсэн оролдлого хийж байна гэж шинжээчид үзсэн байна. Түүнчлэн Трамп Байденыг буруутгаж, энэ хүнийг дахин сонговол улс орон сүйрнэ гэж анхааруулжээ.
"Та бүхний дэмжлэгийн ачаар бид Жо Байденыг Цагаан ордноос хөөж чадна. Тэр бол манай улсын түүхэн дэх хамгийн авлигад идэгдсэн ерөнхийлөгч. Тэр дахин дөрвөн жил сонгогдвол энэ улс сүйрнэ" хэмээн Трамп мэдэгджээ.
Г.Бямбасүрэн
| Уншиж байна |