БНХАУ-ын зээлээр баригдах Эрдэнэбүрэнгийн УЦС-ын зээлийн тусгайлсан хэлэлцээрийг эцэслэж, ирэх долоо хоногт гарын үсэг зурахаар болжээ.

Энэ тухай Эрчим хүчний сайд Б.Чойжилсүрэн “Ерөнхийлөгч У.Хүрэлсүх ирэх долоо хоногт БНХАУ-ын “Бүс ба зам” санаачилгын хуралдаанд оролцоно. Энэ үеэр Монгол-Хятадын тал хэд хэдэн баримт бичигт гарын үсэг зурна.  Үүний нэг нь Эрдэнэбүрэнгийн УЦС-ын зээлийн тусгайлсан хэлэлцээрийг байгуулна.

Хятадын төрийн бүх байгууллагуудын холбогдох шийдвэрүүд гарсан. Монголын талаас төслийн бэлтгэл ажлыг бүрэн хангасан.

Төслийн нийт өртөг болох 266 сая ам.долларын 95 хувь буюу 253 сая ам.долларын зээлийг БНХАУ-аас авна. Зээлийн хугацаа 20 жил, хүү нь 2 хувь байна. Зээлийг 2030 оноос эхлэн эргэн төлнө” гэсэн мэдээллийг өгөв.

Эрдэнэбүрэнгийн УЦС-ыг 2028 онд ашиглалтад оруулахаар төлөвлөж байна.