Сирийн Ерөнхийлөгч Башар Асад болон тус улсын өндөр албан тушаалын офицерүүдийг баривчлах олон улсын зөвшөөрлийг Францын шүүх гаргажээ. Энэ талаар Евроньюс агентлаг мэдээлсэн байна. 

Эх сурвалжийн мэдээлснээр, энгийн иргэдийн эсрэг хориотой химийн зэвсэгийг Сирид ашигласан хэрэгтэй холбоотойгоор Сирийн Ерөнхийлөгч Башар Асад, түүний дүү Махер Асад, хоёр генералыг баривчлан олон улсын зөвшөөрлийг Францын шүүх 11 дүгээр сарын 15-ны өдөр гаргажээ. 

2013 оны наймдугаар сард Сирийн Дума болон Дорнод Гутад химийн зэвсэг ашиглан халдлага үйлдсэний улмаас 1000 гаруй хүн амиа алдаж байв. Энэ хэргийг хүн төрөлхтний эсрэг гэмт хэрэг, дайны гэмт хэрэгт тусалсан гэмт хэрэг гэж Франц улс үзэж, 2021 оноос энэ хэргийг мөрдөн шалгаж байгаа юм.

"2013 онд Гутад химийн зэвсэг хэрэглэсэнтэй холбоотойгоор холбогдох этгээдүүдийг баривчлах зөвшөөрөл гаргаж байгаа анхны тохиолдол нь энэ" гэж Францын шүүхэд нэхэмжлэл гарган хандсан Сирийн хэвлэл мэдээлэл, үг хэлэх эрх чөлөөний төвийг үүсгэн байгуулагч, өмгөөлөгч Мазен Дарвиш мэдэгджээ.

Энд дуулгахад, Сири улс  химийн зэвсэг хэрэглэснээ үргэлж няцаасаар ирсэн. Харин НҮБ болон Химийн зэвсгийг хориглох байгууллага хамтран хийсэн мөрдөн шалгалтаар Сирийн засгийн газар 2017 оны гуравдугаар сард мэдрэл саармагжуулах зарин хий ашигласан нь тогтоогдсон юм.

Г.Бямбасүрэн