Улаанбаатар хотын түгжрэлийг бууруулах үндэсний хорооны дарга, Монгол Улсын сайд Б.Дэлгэрсайхан мэдээлэл хийлээ.

Тэрбээр “Нийслэлийн худалдан авах ажиллагааны газраас зарласан тендер амжилттай болсон. Оролцогч талуудаас санал гомдол гаргахгүй бол тендер баталгаажиж, 12 дугаар сарын 11-ний өдөр шалгарсан компанитай гэрээ байгуулж, автобус нийлүүлэх ажил эхэлнэ.

Бидний хамгийн гол зорилго бол Энхтайваны өргөн чөлөөгөөр явж байгаа автобусны олон давхардлыг арилгах. Тиймээс 2024 оны 01.01-нээс эхлэн автобус хүрээмжтэй болохоор Энхтайваны өргөн чөлөөг нэг чиглэлийн болгож, автобусууд цуварч, хоорондоо 1.3-2 минутын зайтай явна.

Ингэснээр автобусны нэг буудал дээр 22-28 чиглэлийн автобус давхардаж ирдгийг болиулна. Өөрөөр хэлбэл иргэд дамжин сууна. Дамжин суух дэд бүтцийг энэ онд багтаан дуусгах учиртай. Иргэн эхний автобусанд уншуулсан мэдээллээрээ бүтэн өдөржин, хэдэн ч удаа дамжин явах боломжийг бүрдүүлнэ. Энэ үүрэг чиглэлийг нийтийн тээврийн газарт өгсөн байгаа.

Мөн тээврийн цагдаагийн албанд автобусны кармануудыг хаах үүргийг өгсөн. Автобус зам дагуу шулуун зогсоно. Ингэснээр автобусны урдуур машин орохгүй, шууд хөдөлж явах боломж бүрдэнэ” гэсэн мэдээллийг өглөө.

Б.Хэрлэн