Битүүний өдөр ОХУ-ын Элчин сайдын яамныхан МУИС-ийн өмнө байрладаг Х.Чойбалсангийн хөшөөнд цэцэг өргөв. Энэхүү үйл явдлыг ОХУ-ын ЭСЯ-наас "Маршал Чойбалсан Халхын голын байлдааны үеэр Монголын цэргүүдийн анги нэгтгэлийг удирдаж байсан бөгөөд энэ онд бид энэхүү байлдаанд хамтын ялалт байгуулсны 85 жилийн ойг тэмдэглэж байна" хэмээн тайлбарлажээ.

Харин нийтлэлч Баабар уг үйл явдлыг тун өөр өнцгөөр ийнхүү тайлбарласан байна. Тэрбээр "Яагаад битүүний орой Оросын элчин сайд хэдэн хүн дагуулан Чойбалсангийн хөшөөнд цэцэг өргөв? Би параной хүн биш, гэхдээ оросууд түүхэн өдөр сударт ач холбогдол өгөн бэлгэдлээр түүхэн хар өдрийг сануулдаг уламжлалтайг түүхийн шаралсан хуудаснаас сайн мэдэх болсон. Гэндэнг 11 дүгээр сарын 26 буюу түүний УБХ-ын дарга болсон өдөр буудан хороосон. Амарыг яг наадмын өдөр хороох тушаал гаргасан. Чойбалсанг Монголын цагаан сарын битүүнд Москвад хоролсон.

Энэ Цагаан сараар Монголын Ерөнхийлөгчийн урилгаар Германы Ерөнхийлөгч айлчиллаа. Орос элчин ямар ч шалтгаангүй Чойбалсаны хөшөөнд гэнэт цэцэг өргөөгүй ээ. Үүнээс яг 72 жилийн өмнө яг энэ өдөр Чойбалсан Москвад хорлогдож үхсэн. У.Хүрэлсүхэд үзүүлж буй заналхийлэл. Хохь чинь шүү гэсэн сануулга" хэмээн бичжээ.