Төрийн тусгай чиг үүргийг хэрэгжүүлэгч Гадаадын иргэн харьяатын газарт тавилга, эд хогшил худалдан авахаар Дорноговь аймгийн Замын үүд сумын хотын захирагчийн ажлын албанаас ТЕНДЕР зарласан байна. 

Тендерийн төсөвт өртөг нь 800 сая төгрөг бөгөөд энэ хөрөнгө орон нутгийн төсвөөс гарч байгаа аж. Харин энэ хөрөнгөөр ямар ямар тавилга хэрэгсэл авах нь тодорхойгүй байна. Учир нь тус тендерийн баримт бичгийн дэлгэрэнгүй мэдээллийг үзэх боломжгүй байгаа юм. 

Гадаадын иргэн, харьяатын газрын Дорноговь аймаг дахь газар нь 2001 онд байгууллагдсан Монгол Улсын хилээр нэвтэрч буй гадаадын иргэдэд Гадаадын иргэний эрх зүйн байдлын тухай хууль болон бусад холбогдох хууль тогтоомж, Засгийн газрын тогтоолын дагуу виз олгож, бүртгэл, хасалт хийдэг. Мөн иргэний харьяалалтай холбоотой хүсэлтийг хүлээн авч, холбогдох дээд байгууллагад уламжлан шийдвэрлүүлэх, хяналт шалгалт явуулах, албадан гаргах зэрэг арга хэмжээг авч ажилладаг байгууллага юм.