Цагдаагийн байгууллагаас гэмт хэргийн нөхцөл байдлын талаар мэдээлэл хийж байна.

Сүүлийн үед кибер орчинд үйлдэгдэж байгаа гэмт хэргийн 98 хувь нь бусдын нэр дээр нээсэн арилжааны банкны дансыг ашиглаж үйлдэж байна. Виртуал хөрөнгийн хэтэвч, үүрэн холбооны утасны дугаар, цахим сүлжээний хуурамч хаяг ашигласан үйлдлүүд тогтоогдож байна.

Кибер гэмт хэрэгтэй тэмцэх газар байгуулагдсан цагаасаа хойш нийт 2.9 тэрбум төгрөгийн хохиролтой 943 дуудлага хүлээн авч, 1.7 тэрбум төгрөгтэй банкны дансыг хязгаарласан байна. Цахим залилангийн тухай дуудлага мэдээлэлд мөрдөн шалгах ажиллагааг хойшлуулашгүйгээр явуулж, 26 иргэнд учирсан 161 сая төгрөгийн хохирлыг буцаан олгожээ.

Иргэд ихэвчлэн байр, машин худалдан авах, сүүлийн хоёр сард өвс, малын тэжээл авах тухай хуурамч зард итгэж, их хэмжээний мөнгөө шилжүүлэн залилуулж тохиолдолд түгээмэл гарч байна. Иргэн та цахим залилангийн хохирогч болсноо мэдсэн даруйдаа цагдаагийн 102 дугаарын утсанд хандаж, Кибер гэмт хэрэгтэй тэмцэх төвийн ажилтантай холбогдох хэрэгтэй. 24 цагаар үүрэг гүйцэтгэж байгаа ажилтан банктай холбогдож, дансыг царцааж, хохирлыг буцаах боломжтойг Кибер гэмт хэрэгтэй тэмцэх газрын дарга, хурандаа С.Тайван хэллээ.

 Он гарснаас хойш илрүүлсэн зарим хэрэг:

Монгол Улсын иргэн, 17 настай Ш нь 283 иргэний фэйсбүүк хаягийг хууль бусаар авсан. Таны утсанд код ирнэ, кодыг явуулаач гэсэн үйлдлээр 283 иргэний цахим хуудсыг хакердаж авсан. Мөрдөн шалгах ажиллагаагаар 29 иргэнээс 13 сая төгрөгийг шилжүүлэн авсан нь тогтоогдоод байна. Мөрдөн шалгах үргэлжилж байна.

Машин зарах тухай хуурамч зар оруулж, иргэний банкны мэдээллийг Токи апплейкшнд оруулж, дансан дахь мөнгийг нь хулгайлсан хэргийг ирүүлсэн. Одоогийн байдлаар 100 иргэний картын мэдээллийг нь авсан хэргийг шалгаж байна.

Арилжааны банкны ажилтан  М нь нэр бүхий банкны апплейкшны цоорхойг ашиглан, иргэдийн цахим хэтэвчийг шинээр үүсгэж, хадгаламжийн мөнгийг татаж авдаг ноцтой гэмт хэргийг илрүүлсэн.

Сүүлийн үед арилжааны банк, санхүүгийн байгууллагуудад залилангийн гэмт хэрэг ихээр үйлдэгдэж байна. Тиймээс өөрийнхөө цахим хэтэвч болон татаж авсан зээлийн апплейкшнуудаа утсгах шаардлагатай байгааг Кибер гэмт хэрэгтэй тэмцэх газрын дарга, хурандаа С.Тайван анхаарууллаа.