Н.Номтойбаяр улс төрөөс явсан, намаасаа хэрхэн хөөгдсөн тухай түүхээ өнөөдөр хэвлэлийн хурлын үеэрээ эргэн дурслаа. Тэр бол олон жилийн өмнөөс улс төрийн хүрээнд яригдсан 30 гэр бүлийн нэг буюу Монголын тэргүүн баячуудын нэг. Монголын ард түмний эзэмшилд байх ёстой "Цагаан суварга” гэх 240 сая тонн хүдэр, 1,8 сая тонн зэсийн нөөцтэй маш их баялгийг ТЭДНИЙ гэр бүл эзэмшдэг. Энэ тухай одоогийн Ерөнхийлөгч У.Хүрэлсүх  Ерөнхий сайд байхдаа Н.Номтойбаярт хандан "МАК компани гэхэд 36 лиценз эзэмшдэг. “Цагаан суварга” бол танай гэр бүлийн өмч биш монголын ард түмний өмч. Хууль бус гэж би ойлгож байгаа. Нэг гэр бүл 36 лиценз эзэмшихгүй. Чи үнэхээр эх орондоо хайртай юм бол “Цагаан суварга”-ын ордыг ард түмэнд буцаагаад өг” хэлж байсан нь хар дээр цагаанаар бичигдэн үлджээ.

Энэ үйл явцаас хойш зургаан жилийн дараа Н.Номтойбаяр эвсэл байгуулан улстөрд эргэн ирлээ. Тэдний гэр бүл өнөөдөр ч ЦАГААН СУВАРГЫН ордыг эзэмшдэг. 

Сануулахад, З.Энхболд даргатай парламент 2014 оны хаврын чуулганаар “Цагаан суварга”-ын ордыг эдийн засгийн эргэлтэд оруулах асуудлыг хэлэлцэж, улмаар төрийн мэдлээс гаргаж, МАК компанийн 100 хувийн мэдэлд шилжүүлэх шийдвэр гаргаж байв. Ингэж ЦАГААН СУВАРГА ганцхан гэр бүлийн мэдэлд очсон. Ингэж МАК гэх вант улсынхан Цагаан суваргын ордод эзэн суухад  УИХ-ын гишүүн А.Бакей, Сү.Батболд, Ж.Батсуурь, Д.Батцогт, Г.Баярсайхан, С.Бямбацогт, Д.Ганбат, Б.Гарамгайбаатар, Р.Гончигдорж, Ц.Дашдорж, Д.Дэмбэрэл, С.Дэмбэрэл, Д.Зоригт, Д.Лүндээжанцан, Ц.Нямдорж, С.Одонтуяа, Ё.Отгонбаяр, Д.Сарангэрэл, Я.Содбаатар, М.Сономпил, А.Тлейхан, Ч.Улаан, Ч.Хүрэлбаатар, Б.Чойжилсүрэн, Ж.Энхбаяр, Л.Энх-Амгалан, М.Энхболд, З.Энхболд, Н.Энхболд, Ө.Энхтүвшин, Д.Эрдэнэбат, Ж.Эрдэнэбат нарын гишүүд кнопоо нэмэрлэж байв. Нэг үгээр дээрх нэр бүхий хүмүүс Цагаан суваргын ордын төрийн хувь эзэмшлээс татгалзсан байдаг. 

Сонирхуулахад, өнгөрсөн онд Шилэн ажиллагааны хүрээнд МАК  компани 23 тусгай зөвшөөрөл бүхий 56 мянган га газар эзэмшдэг баримт нийтэд хүрсэн. МАК компани тусгай зөвшөөрөл эзэмшлийнхээ тоогоор улсад хоёрдугаар бичигддэг. Тухайлбал, "Цагаан суварга"-ын ордыг 2044 хүртэл эзэмшинэ.  “Цагаан суварга”-ын зэс-молибдений баяжуулах үйлдвэр нь 1950-аад оноос эхлэн улсын төсвийн хөрөнгөөр хайгуул хийсэн стратегийн орд. 

Тэгвэл дээр нэр дурдсан улстөрчдийн дэмжлэгийн хүчээр нэг гэр бүлд очсон Цагаан суваргын ордыг ард түмний мэдэлд эргүүлэн авчрах 2014 оны парламентын баталсан тогтоолыг эргэн харах асуудал улс төрийн хүрээнд яригдаж эхэлсэн тухай бор шувуу нисэж эхлээд байна.